Ki 35 ngut ki MLA Khasi ki dei ban dawa beit ban pynkylla ïa ka Reservation Policy : HNYM

Shillong, Jymmang 13: Ka Hynñiewtrep National Youth Movement (HNYM) ha ka sngi Saitjaiñ ka la maham ba ki 35 ngut ki MLA Khasi kim dei ban sngap jar ha ka All Party Meeting ban sa lum ka sorkar ha kaba ïadei bad ka Roster System ha kine ki sngi kiban wan hynrei ba ki dei ban daw beit ïa ka jingpynkylla ïa ka Reservation Policy.
Haba kren sha ki lad pathai khubor u President ka seng u Bah Louis Dohtdong u la ong ba ka seng ka maham ba lada ki 35 ngut ki MLA Khasi ki sngap jar ha kane ka jingïalang na ka liang ka seng ka shim da ki sienjam kiba tyngeh.
“Baroh ngi sakhi ïa ka jingshah ktah na ka jingpyntreikam ïa ka Roster haduh ba ki khun samla kim lah shuh ban aplai kam naduh ba pyntreikam ïa ka Roster jong ka Reservation policy namar kiba bun ki kam la bhah beit tang na bynta ki paralok Garo na kata ka daw ngi khmih lynti ba ki MLA na ka jaidbynriew kin kren eiei halor kane ka bynta,” u la ong.
U la ong ruh ba ka jingpyntreikam ïa ka Reservation Policy hi ka la buh bah ki jingdkhoh haduh ba wat kiwei pat ki jadibynriew bym dei Garo ki lah ban ïoh ïa ka bhah kam na ka bhah ki garo bad wat ki garo bym dei na kane ka jylla ruh ki lah ban ïoh ïa ka bhah kam kaba la mang na bynta ki Garo ba sah ha ka jylla.
Shuh shuh u la ong ba ka sorkar ka dei ban pynkylla ïa ka Roster kat kum ka jingdawa ka por bad ong ba ka seng ka kyrshan ïa ka jingai jingmut u MLA ka Congress u Saleng A Sangma uba la ai jingmut ban pynduh ïa ka bhah ba mar 40% ïa ki Khai bad Garo.
“Ka sorkar ka dei ban pdiang ïa ka jingai jingmut u MLA ka Congress u Saleng Sangma uba la ai jingmut ban bhah kyllum na bynta ki jaidbynriew trai muluk ka jylla kata ki Khasi bad Garo da 80% bad kat kiba dei hok ban ïoh na ka jinglah ban pyndep ïa ki eksamin kam kin ïoh ïa kane ka bhah,” u la ong.
“Ka seng ka kyrshan ruh ïa ka sienjam kaba ka VPP ka la shim ha kaba ïadei bad ka jingpynkylla ïa ka Reservation Policy kat kum ka jingdon briew bad nga kwah ban kren shai ba ka sorkar la kumno kumno ka dei ban shim ïa kawei na kine ki jingai jingmut lym kumta na ka liang ka seng kam banse ban shim ïa ki sienjam kiba tyngeh pyrshah ïa ka sorkar bad mynta ngin ap shuwa ïa ka All Party Meeting bad lada kam seisoh kumba ngi dawa bad ngi khmih lynti na ka liang jong ngi ngin shim da ki sienajm kiba tyngeh na bynta ban pynïoh ïa ka hok ki khun samla ka jaidbynriew,” u la bynrap.