Nga pdiang hun ïa ka rai u paidbah, ong u Bah Samlin hadien ba shah rem

0

Shillong, Jymmang 13: U MLA barim ka Sohiong uba la jop na ka seng HSPDP ha u 2028 uba la aireng kum u kyrtong ka NPP ha kane ka elekshon ba mynta u Bah Samlin Malngiang u la ong ba ka jingjop u Bah Synsharlang Kupar Lyngdoh ka dei ka rai kaba u paidbah ka Sohiong u la ai ïa ka rai bad ma u kum u kyrtong u pdiang hun mynsiem ïa ka rai u paidbah.
Haba kren sha ki lad pathai khubor hadien ba la dep ka jingñiew vote u Bah Samlin u ong ba wat la ha ki san snem kum u MLa u la pyndep hok la ka kamram hynrei lada u paidbah um pat ihun ban pynjop biang na ka liang jong u ruh un hun namar dei u paidbah uba ai ïa ka rai kaba khatduh.
Haba kylli la ka jingleit pynïasnoh jong u sha ka NPP ka dei ka daw kaba ki paidbah ki kyntiat noh ïa u, u Bah Samlin u la ong ba ka jingïasnoh jong u sha ka NPP ban ïakhun ha kane ka elekshon kam dei ka daw ba u rem ‘hynrei u paidbah u kylla kynsan ha kine ki shisngi arsngi, ban ong ba nga rem na ka daw ba nga pynïasnoh sha ka NPP ka long kaba bakla namar shuwa ban shim ïa ka rai u la syllok bad ki paidbah nongkyrshan bad ki ruh da kawei ka sur ki la bthah ba ngan pynïasnoh beit sha ka NPP,’ u la ong.
“U Paidbah u la pynjop ïa u kyrtong ka UDP bad nga khmih lynti ba un trei bha ban pyndep ïa ka lyngkor kaba u paidbah u la bynshet ha u,” u la bynrap.

Leave A Reply

Your email address will not be published.