Shillong, Jymmang 13:Ka jaka ri khyllung lane ka Crech Centre ba la pynïaid da ka Seng Teilang Kynthei Laban ïa kaba la seng naduh u snem 1982 ka la kylla dur na kaba ka ju long mynshwa da ka jingnoh synñiang u Bah Mitchell Wankhar, MDC ka Laban-Mawprem uba dei ruh u Executive Member ka Khasi Hills Autonomous District Council (KHADC).
Da ka jingsngewkmen, hadien ba la dep shna pynbha bad moramot ïa kane ka jaka ri khyllung, ki nongïalam ka Seng Teilang Kynthei Laban ki la khot ïa u Bah Mitchell ban wan ot ribbon kum ka dak ka jingplie ïa ka ha ka nohphai sngi 11 tarik u Jymmang, 2023.
Kane ka jaka ri khyllung ka don haka lai ngut ki nongtrei lane ki aïa kiba peit ïa ki khyllung kiba don kumba 17 ngut eiei. La pdiang burom ïa u MDC da ki nongkitkam bad dkhot ka Seng Teilang Kynthei Laban ha ryngkat ki longkmie kiba ju phah ri ïa ki khun jong ki ryngkat ki samla na ka shnong.
Nalor kane, u Bah Mitchell u la noh synñiang jingïarap sha ki nongtrei kane ka jaka ri khyllung kiba la trei bun snem ha kane ka jaka bad kumjuh sha ki nonghikai kiba ai jinghikai suh bad thaiñ jaiñ ha ka jaka ai jinghikai jong ka Seng.
Haba ai jingkren, u Bah Mitchell u la ai ka jingïaroh ïa ka Seng kaba la ïai trei katta ki snem ban shakri ïa ka imlang sahlang. “Nga kular ban ai ka jingïatreilang bad phi ha kino kino ki bynta ban pynbha ïa ka imlang sahlang khamtam ha ka jingïadei ban ïada na ka jingwan rung u drok u ba ktah ïa ki longïing longsem”, u la ong.
“Ha ka por ba nga wan jngoh ïa kane ka jaka nga la ïohi ba ki dieng ki lyntang iing ki la pyut lut bad nga la pyrkhat ba ka dei ka jaka ri khyllung kumta kan buh jingma lada ym pynbha ïa ka “, la ong u Bah Mitchell da kaba ai khublei ïa ka Seng kaba la wan sha khmat ban ïakren bad ïatreilang.
Na ka liang ka President ka Seng, ka Dr Wanda Mylliemngap ka la ong ba ka Seng ka ïoh mynsiem na ka jinglong la kloi u Bah Mitchell ban ïarap kylluid mynsiem ban shna pynbha ïa kane ka jaka lyngba ka mang tyngka jong ka 15th Finance Commission lyngba ka KHADC.
Kane ka jaka ri khyllung la pynbha ha ka rukom kaba biang bha naduh ki sad, ki lyntang siang bad kiwei ki jingdonkam. La pynïaid ïa ka jingïalang da ka kong AS Rangad kaba dei ka nongai jingmut kane ka seng kaba la pynsngew ba ka thong jong ka seng ka long ban kyntiew ïa ka imlang sahlang ha bun ki liang.
Hadien kane ka jingïalang, u Bah Mitchell ryngkat ka jingsynran lang ki nongïalam ka Seng ki la leit ban noh synñiang da ki tin sop ïing sha ka longïing jong ka Joya Wahlang kaba la mad ïa ka jingpluh ding ha u bnai Kylllalyngkot, 2023.
