Shillong, Jymmang 13 : U Khliehduh jongka United Democratic Party (UDP) u bah Metbah Lyngdoh u la kren shai kdar ba ka party jongu kam don jingkwah ban ïa pynkhynñiuh shuki ne pynkhyllem sorkar bad kan ïaineh beit bad ka MDA-2 haduh ba kut ka samoi san snem.
“ Kumba ngi la kular ha ki san snem ba la dep ba ka UDP kan ym leh ïa kino kino ki kam ban pynkhyllem sorkar hynrei kan ïatrei lang bad ka MDA ban pynskhem ïa ka sorkar khnang ban ïoh shakri bha ïa ki paidbah” ong u bah Metbah haba haba jubab ïa ka jingkylli ki nongpathai khubor hato kan don ne em kano kano ka jingkylla hadien ba ka UDP ka la jop ïa ka Election ha ka Sohiong Constituency.
U la pynkynmaw ba ka UDP ka ïatrei lang haduh ba kut ha ka sorkar MDA-1 kumta u la ong “ Ha kane ka kynti ruh ngi la dep kular ba ngin ïatrei lang ha ka sorkar MDA-2 namar ngi kwah ban skhem ka sorkar bad biang ka jingsynshar ha ka jylla”.
U la ong ka jingskhem ka sorkar kan pynlong bad ailad ïa ka sorkar ba kan ïoh por ban ai ka jingshakri hok ïa ki paidbah.
Namar u la ong kino kino ki jingpynkhih ne pynkhyllem sorkar kim lah satia ban wanrah ka jingkiew, jingkylla bad jingroi jingpar ha ka jylla.
