Shillong, Jymmang 13 : Kat kum ka khubor ba la ïoh la ïathuh ba ka la don ka jingpynkhie im biang ïa ka kynhun Garo National Liberation Army (GNLA) da kito ki nongïalam kiba shah kem bad ba wan pyndem wait bad la ïathuh ba ki la phah mynta ïa kumba 500 ngut ki samla na kylleng ka Ri-lum Garo ban leit hikai pyntbit sha Nagaland bad sha Burma.
Ka Kynhun GNLA ka dei ka kynhun kaba la pynkha da u Heh Pulit Meghalaya Police Service (MPS) uba la kylla riew saiñ pyrthei u Champion R Sangma bad u Commander in-Chief ba la kyllon iap u Sohan D Shira.
Kat kum ka khubor ba ïajan bad ka Tnad Pulit la ïathuh ba ki ehrang ka GNLA kiba la kynjah jar la bun snem mynta, ki la sdang ban ïalum biang ban pynkhie im ïa ka GNLA, kaba la iap hadien ka jingkyllon iap u C-in-C bad jingwan pyndem bun ngut ki dkhot jongka.
Ki Pulit ki ïathuh ba na ka jingïoh lum khubor na ki dkhot ba pyndem wait ka GNLA, la pyntip ba ka GNLA ka la sdang ban ïalum briew biang ban pynim ïalade bad ka la pynlong ïa ki jingïalang ha kylleng ki jaka ka Ri-lum Garo ban pynrung dkhot ïa ki samla.
La ïathuh ba kane ka Kynhun kala pynlong ïa ka jingïalang kum ha Jadi, Nongal, Chalang, bad kiwei kiwei ban khring ïa ki samla ba kin wan pynïasoh sha ka kynhun.
La ïathuh ba kat kum ka jingïoh lum khubor, ki la don palat 500 ngut ki samla ki la rung dkhot sha ka GNLA bad la phah ïa ki mynta sha Nagaland bad Burma ba kin pyndep ïa ki jinghikai pyntbit ha ka kiengatiar.
Ha kajuh ka por, ka khubor ka ïathuh ruh ba ki don ki Heh Spah/Nongkhaïi ba paw, ki la don jingïadei ba ïajan bad ka GNLA bad ki la bei pisa ban pynkhie im ïa ka kynhun.
Halor kane ka khubor, ka Tnad Pulit kala bthah ia ki Heh Pulit ka Ri-lum Garo ba kin peitngor bad buddien ïa ka ïaid ka ïeng, ka trei ka ktah jong ki Dkhot ka GNLA ba la pyndem wait kynthup kiba shah kem, ban wad ïa ki nongkyrshan bad ki nongïarap, ki nongbei tyngka ha la ki jong ki jong ki jaka.
La bthah ruh ban pynlong ïa ki jingkhynra, jingïaid pahara da ki kali bad kjat man ka por ha ki jaka bala tip ba ki dei ki jaka rieh jong ka GNLA ban khanglad ïa ki kam pyntriem jong kane ka kynhun ha Ri-lum Garo.
