Election Sohïong Constituency : Liem u Bah Samlin ha u kyrtong ka UDP haduh 3422 vote

Shillong, Jymmang 13 : Ka Sohïong hynne ka sngi ka la ïoh da u MLA ba thymmai na ka United Democratic Party (UDP) Bah Synshar Roy Kupar Lyngdoh Thabah uba dei ruh u pyrsa kur jong u MLA bad Myntri barim ka sorkar jylla uba la khlad noh dang shen, Bah HDR Lyngdoh.
U Bah Synshar u la ïoh ruh ïa ka jingjop kaba donburom kata da kaba ïoh ban pynliem haduh 3422 vote ïa u MLA barim, Bah Samlin Malngiang u ba aireng na ka National People’s Party (NPP).
Ha kane ka sngi ñiew vote, naduh ka kylla kaba nyngkong u kyrtong ka UDP u la ïoh ban lamkhmat tad haduh ban da poi ka kylla kaba khatduh bad haduh ban da pynbna kum u nongmihkhmat ba thymmai ka Sohïong.
Haba phai sha ka kylla kaba nyngkong, u Bah Synshar u la ïoh 3081 vote katba u Bah Samlin pat u la ïoh 2060 bad kane ka la pynlong ïa u kyrtong ka UDP ban ïoh lamkhamt haduh 1000 vote tam. Ha ka kylla kaba ar pat u Bah Synshar u la ïoh ban tam haduh 1903 vote.
Kane ka ïai bteng ruh ha ka kylla kaba lai ha kaba u kyrtong ka UDP u la ïoh ban tam biang sa 2458 vote, nangta ha ka kylla kaba saw da 2815 vote. Khyndiat ynda la poi ha ka kylla kaba san ba u Bah Synshar u la ïoh ban lamkhmat 2689 vote hynrei tang ha ka kylla kaba hynriew pat u la ïoh ban tam biang da 3321 vote.
Kumta tad haduh ban da poi ka kylla kaba khatduh bad kaba hynñiew, u Bah Synshar u la ïoh ban tam kput syndon haduh 3422 vote, kata da kaba ïoh haduh 16,679 vote katba u Bah Samlin pat u ïoh 13,257 vote.
Da ka jingjop ha Sohïong, ka UDP mynta ka la don haduh 12 ngut ki MLA ha Iing Dorbar Thawaiñ ka jylla. Ha kajuh ka por u kyrtong ka Congress, Bah S Osborne Kharjana pat u la wan ha ka kyrdan kaba lai da ki 1762 vote.
Tam u NOTA ïa ki lai ngut : Kane ka elekshon ka sakhi ruh ïa ka jingtam jong u NOTA (None of the Above) ïa ki lai ngut ki kyrtong. U NOTA ha kane ka elekshon ha Sohïong u la ïoh haduh 272 vote katba kitei ki lai ngut ki kyrtong kata kynthup naduh u kyrtong ka Hill State People’s Democratic Party (HSPDP) Bah Sandondor Ryntathiang uba ïoh 62 vote, u kyrtong ka All India Trinamool Congress (TMC) Bah Stoding Thabah u ïoh 89 vote katba u kyrtong ka BJP Bah Seraph Eric Kharbuki u ïoh 40 vote.
Lah ban kdew hangne ba kane ka elekshon ha Sohïong kaba la pynlong kham hadien ban ïa kiwei pat ki constituency kadei hadien ka jingkhlad kyndit noh u Bah HDR Lyngdoh ba dei kyrtong ka UDP. Hadien kane ka party bad kumjuh na ka iing jong utei u kyrtong barim da kawei ka rai ki la jied ïa u Bah Synshar Thabah ban mih pli kum u kyrtong.