Shillong, Rymphang 25: Ha ka sien ïakhun kaba lai ka kynhun phutbol jong ka jylla Meghalaya ka la ïoh ban khur ïa ka shi point ha ka jingïalehkai ka lympung 77th National Football Championship na bynta ka Santosh Trophy 2023-24 hadien ba ka la ïakhaid da mar kawei bad ka Kerala ha Itanagar hynne ka sngi.
Na ka liang jong ka Meghalaya ka la ïoh ban kyntiew ïalade sha ka kyrdan ba 5 na ka thup jong ka Group A naba rem ha ki ar sien ki jingïalehkai ba hashwa, katba na ka liang jong ka Kerala ka la ïoh ban khur mynta 4 point na ki 3 sien ïakhun bad ka shong ha ka kyrdan ba lai jong ka Group.
Hashwa ba ka kynhun kan jam sha kane ka jingïalehkai, u Coach- Bah Khlain Pyrkhat Syiemlieh u la wanrah jingkylla ha katto katne ki bynta hadien ba rem ha ka Assam ha kine ki ar sngi ba ladep. U Siwel Rymbai u la mih bujli kum u rangapkol ha jaka u Lionel Rymmei, katba kiwei pat ki player kiba la bujli ki long u Damonlang Pathaw, Dawanplielad Myrchiang, Kitboklang Pale bad Nelson Rymbai. Kiba shong ben ki long u Lukas Syngkli, Baiaikara Swer, Chesterpaul Lyngdoh bad Shaiborlang Kharpan.
Haba phai sha ka jingïakhun, ka Kerela ka la ïoh ban pynkhihjar nyngkong tang hadien saw minit ba la ïaid ka por lyngba u Naresh Bhagyanathan. Bad naduh kane ka por ka Meghalaya ka la ïakhun dohïap ban ïoh pynïakhaid, ïa kaba ka kynhun ka la lah ban pynurlong ha ka kylla miet.
Ka jingtrei shitom jong ka Meghalaya ban thaw ïa ki lad da kumno ban ïoh pynkhihjar kam shym la long kaba sepei hadien ba u Sheen Sohktung u la lah ban pynurlong ïa ka jingangnud ka kynhun ban pynphai ïa katei ka shi kol ha ka 77 minit hadien ba u bak ka Kerela-u Sarath KP u la pynur ïa u Sheen ha phyllaw kol (box). Ka la don ka jingartatien shipor hadien ba u Azhar (rangapkol ka Kerela) u la ïoh ban da ïa ka bol da ka kti na ka penalty ba la shut da u Sheen hynrei u ne u rangïalehkai khmat ka Meghalaya u la pynkloi ïalade ban mareh sha ka bol bad thep ïa ka jlang shapoh kol ban pynïakhaid.
Haduh kaba kut ym shym la don shuh ba lah ban pynkhihjar kaba la pynlong ïa kine ki ar kynhun ban ïasam mar shi point na ka kane jingïakhun.
Ka Meghalaya kan ïakhun biang sa ha ka 28 tarik mynta u Rymphang bad ha katei ka sngi kan long pyrshah ïa ka Goa ha ka por 7 baje jan miet.
