Shillong, Rymphang 23 : U Symbud Myntri Rangbah ba khmih ïa ka Tnad kam Pohïing Bah Prestone Tynsong ha ka sngi Thohdieng, ula ong ba ki Bor Pulit ka jylla kin ym ailad da lei lei ruh ban khie im biang ka seng Garo National Liberation Army (GNLA) ha Ri-lum Garo.
Kane kala mih hadien ba ka GNLA Re-group (GNLA-R) kala pynmih ïa ka kyrwoh halor ka rai ban pynkhie im bad thaw kynhun namar ki ishu bapher bapher jong ka Ri-lum Garo.
“Ki Bor Pulit kila trei khlem shongthait bad ngin pynthikna ba ka jingkhie im kan ym jia da lei lei ruh” ong u Bah Prestone haba ïakren bad ki nongthoh khubor.
Ula ong ba ki Pulit kin dang tohkit ban tip la kane ka kyrwoh ka GNLA-R ka dei kaba shisha ne kaba lait. “Hynrei kaei kaba nga mut ban ong ïa phi ba long ba baroh arphew saw kynta ha ka shisngi, ki Pulit ki long kiba la khreh ïa kum kine kiei kiei”.
“Lehse dei ki katto katne ki briew lane ki khynnah kiba kwah ban im pahuh pahai da ka jingthaw kynhun. Ngi la peit pyrman bha bad ngim ym thiah bad ngin pynthikna ba ka jingpynkhie im ïa ka kynhun kan ym jia satia” ula ong.
Ula pyntip ba ka Tnad kala pynkhlaiñ ïa ka jinglum khubor syntiat bad ong “Sngewbha ïeh ha ngi..ai ba ngan kular ha phi ba ka jingpynkhie pat kan ym jia bad ngin ym ailad satia ïa kata”.
