Shillong, K’lyngkot, 22: Katba ki sngi ban jied ïa ki nongmihkhmat ba thymmai jong ka jylla kan sa long ha ka 27 tarik, Rymphang, ki bor Pulit jong ka Ribhoi District kiba la pynlong ïa ki jingkhynra bad ki jingpynap shrip ki la ïoh kurup san tylli ki biskit ksiar kiba shongdor T. 30 lak bad ïa ka kyiad beaiñ.
Hynnin ka miet sngi Saitjaiñ, ki Pulit jong ka Ribhoi District kiba la pynlong ïa ka jingkhynra ha Nongpoh, Wahlakhar, Rajabagan, Mawhati, Byrnihat, Kyrdeng, Umïam Pilangkata, Patharkhmah bad Baridua ki la ïoh ban kurup 9.915 litar ka kyiad phareng (IMFL) bad 81.5 litar ka ka kyiad pyrsi.
Ha South West Khasi Hills District, ki Pulit ki la ïoh ban kurup 105 litar ka kyiad pyrsi ha ka sngi U Blei ha ka shnong Gomaghat.
Ha kaba ïadei bad ka jingïoh kurup ïa ki biskit ksiar ki Pulit kiba la pynlong ïa ka jingtalasi ïa ki kali ha lad Umsning kum ka jingpyntreikam ïa ka Model Code of Conduct (MCC), ki la ïoh bat ïa kawei ka kali kaba don ïa u nombar AS 01DT-6749.
Ki Pulit kiba la talasi ïa kane ka kali ki la lap san tylli ki biskit ksiar na uwei u briew uba la tip kyrteng kum u Sahidul Islam.
U Chief Electoral Officer (CEO) ka Jylla Meghalaya u Bah Frederick Roy Kharkongor ha u kyrwoh ba la phah sha ki lad pathai khubor u la ïathuh ba ïa kine ki biskit ksiar la kurup noh mardor bad ïa ka kali bad ha kajuh ka por ki Pulit ki la pyntip noh ïa kane ka jingjia sha u District Election Officer (DEO) na ka bynta ban leh ïa kaba donkam.
Hadien kane, ïa kine ki biskit ksiar la thew da u Bah Binsing Kharphuli jong ka dukan die ksiar ba la tip kum ka B. Kharphuli Jewellers, ha ryngkat ka jingsakhi lang jong u Majistor uba long ruh u Assistant Returning Officer-Election bad hakhmat ki nongsakhi.
Ka jingkhia jong kine ki biskit ksiar ba la ïoh kurup ki long 570 gram bad kiba shongdor T. 30 lak. Hadien ba ladep thew ïa ka jingkhia bad ïa ka jingheh, la song bad la pyndait laha hakhmat jong u ARO, u Additional Superintendent of Police ka Ri Bhoi District bad ki nongsakhi, la ïathuh u Bah Kharkongor.
Ïa kine ki biskit ksiar la buh ha ka kut jong ki Pulit ka Umsning Police Station.
Dang ha ka miet sngi Palei, ki Pulit ka East Jaiñtia Hills District ki la ïoh ban kurup T. 10.72 lak ka pisa.
Ïa kane ka song pisa la ïoh kurup la ka jong ka por da ki Pulit jong ka Umkiang kaba hap hapoh ka Sutnga-Saipung Constituency da ka jingsakhi lang jong u Majistor.
Ka pisa kaba la ïoh kurup ha kane ka sngi ki long, T. 1.85 lak, sa T. 2.875 lak bad T. 6 lak.
