Nga lehraiñ haba ki ong ka shnong ba sdang ïa u ABKD kam pat sei MLA da u trai shnong : Alan West

By Mawphor News Desk On Jan 23, 2023

Sohra, K’Lyngkot 22 : U kyrtong ka NPP na Sohra, Bah Alan West u la ong ba u sngew lehraiñ haduh katta katta haba ki paralok ki ju ong ba watla ka Sohra kadei ka shnong kaba la pawnam ha ri Khasi ha ka jingnang jingstad bad ka jingshemphang hynrei kam pat lah pat ban sei MLA da u trai shnong.
Haba kren ïa kane ha ka jingïalang jong ki nongkitkam ka party ha Sohra ha kane ka sngi Saitjaiñ, u Bah Alan u la ong ruh, “Ka shnong jong u ABKD da dei ban jied MLA pat hap shim kylliang. Hato ym long mo ban pyneh rngiew shisien da u trai shnong. Nga dei ka jubab bad nga wanphai sha shnong ban jubab.”
Shuh shuh u ong ruh lada u jop kum u MLA um kwah ban kut tang ha ka sam skim MLA, sam tine ne skim maramot iing namar kitei baroh lah ban leh da ki ophisar ruh. Hynrei u ong ba ka jong u, ka long ban phaikhmat sha ka ïoh ka kot bad ruh ha ka ïohkam ïohjam.
Haba kren pat halor ka distrik, u la ong ba u dei uwei na kiba ïalum lang ban dawa distrik ha Sohra. U ong ruh ba ki pangmet haduh katta katta ba ha ka por ba pynbna pat ïa ka distrik, la poi pynban sha Mairang.
Shuh shuh u ong ruh ba u khlem mut satia ban ïaleh elekshon hynrei dei da ka jingwan kynduh jong u Bah Prestone Tynsong bad u Conrad Sangma ba u la kynmaw ba khlem pep ki nong Sohra kin sa kylli shaphang ka Distrik bad kumta u la shim kabu ba lada ki rai ban ai distrik ma u ruh un kular ban ïakhun.
Nalorkata, u ïathuh ruh ba ka don ka por ba ma u bad ka kynhun ki la mut ruh ban weng noh na katei ka jingthmu hynrei dei da ka jingkular jong u Myntri Rangbah ba dei ruh u National President ka NPP kumjuh u Bah Prestone ba la pynbeit ïa ka jingïalang ha Sohra ha ka 05tarik u Kyllalyngkot mynta u snem.
“Hadien ba la pyntikna ba ïa ka Headquarter jong ka distrik ba thymmai kan dei ha Sohra, ha katei ka sngi hi nga sngew ba ka la dei ka jingjop namar watla ngam dei u MLA ne MDC pynban nga thrang ban ïasaid lang bad ki nong Sohra.”
U Bah Alan u la ïaroh ruh ïa u MLA ka Mairang da kaba ong ba utei u nongmihkhmat u ïalam hi dalade na khmat ym ban phah da ki paidbah ban leit dawa distrik. “Ka Mairang ka ïoh distrik ba MLA u ïalam nakhmat ym da kaba phah tang ïa ki paidbah,” u la bynrap biang.
Ha kane ka sngi u la kren ruh halor ka MCCL kaba la khyllem ka rukom treikam watla kadei ka pliang ja jong ki nong Sohra, nangta ka ïoh ka kot bad bun kiwei kiwei ki phang.
Ha kane ka sngi la ïoh ruh ïa ka jingkren na ka Kong Carmel Sawian kaba wan na Australia ban synran ïa utei u kyrtong ka NPP na Sohra. La ïoh ruh ïa ka jingkren na u Vice President ka NPP East Khasi Hills, Bah Jansing Tynsong bad kiwei kiwei.