Bamduh ka ding ïa ar tylli ki ïing ha Laban, hap kynriah ar tylli ki longïing

0

Shillong, K’Lyngkot 22 : Ar tylli ki longïing ki la shah pynjulor ha ka ding ba khlaiñbor kaba la pynlong ïa 12 ngut ki briew kynthup ïa i khunlung ba dang shi bnai ban hap kynriah noh mardor sha kawei pat ka jaka hadien ba katei ka ding ka la bamduh naphang lin ïa ka jaka sah jong ki ha Laban. Ka la don ruh ka jingkynnoh ba wat hadien ba la pyrshang da baroh kynthup na ka police station ba don hajan hynrei ka shimpor haduh kumba 40 minit ei ei ban poi.
La kynnoh ruh ba kat ban da poi kitei ki kali pynlip ding, kitei ki ïing baroh ki la julor lut bad kitei kiba shong ba sah hangtei ki la kylla khlem ïing khlem sem shuh. Ka longing jong Gauri Das bad Sujata Thapa ki la duh lut ïa ki jingdon jingem jong ki baroh ha katei ka ding kaba la bam duh lut ïa ka ïing Assam-type kaba don hajan Laban Bengalee Girls’ Higher Secondary School kaba don ruh tang kumba katto katne pruh na Police Station Laban.
La ïathuh ba ka Das ka la ïohi nyngkong eh ïa ka ding kaba la suba ba ka lah ban dei na ka jingthut ha ka bor ding ha ka por ba ka dang bunkam ban kren ïa ki paralok ha katei ka janmiet sngi u Blei. Katba ka Thapa pat bad ki bahaïing ki dang don ha ïing mane. “Ngi la mih lut shabar ïing ngi khlem lah shuh ban sei ei ei. Ka don ka laptop bad katto katne ka pisa ruh baroh ki la leit lut,” ong ka Das da kaba ïathuh ruh ba ka tapmoh ba ka tap ïalade ruh kadei jong ka khun.
Ka Thapa pat ka la ïathuh ba ka la shong wai hangtei na ka bynta lai snem bad ka sah hangtei bad ka kmie ryngkat ka khun. Katba ka Das pat ka sah bad u kurim jong ka, u Bipul Das kynthup ka khun kaba sah lang. Ki la leit ban sah ha katei ka ïing san snem mynshwa ha shwa ban shongthait u kurim jong ka. Kitei ki ar tylli ki longïing ki thmu ban sah noh ha ki ïing jong ki bahaïing katba kim pat ïoh ïa ka jaka sah kaba biang.
Na ka liang ka trai ïing, ka Bijoya Wahlang ka la pynpaw ba kam don shuh ei ei ban ong haba ka ïohi ba ka ding ka la bamduh ïa ka ïing jong ka hynrei ka ong pat ba bha bok ba ym shym la don mano mano ruh ba mynsaw ne kino kino ki jingjia ba sngewsih. Na ka liang ki heh pulit ki la ïathuh ba mynta ki dang ap ïa ka report na ka tnad Fire and Emergency Services ban pynlong ka jingtohkit la shai ka sngi ban lap ïa ka daw jong katei ka jingjia hashwa ba kin ïaid shakhmat ïa ka kam kumba dei ka lynti.

Leave A Reply

Your email address will not be published.