3 ngut ki kyrtong ka NPP kiba dang don hapdeng ka jingïakhun mukotduma ha ïingbishar

0

Shillong, Kyllalyngkot 22 : Ha ka Sngi Saitjaiñ ka NPP ka la pynbna ba lai ngut na ki kyrtong jongka ki ban ïakhun ïa ka election MLA 2023 ki dei kiba dang don hapdeng ka jingïakhun mukotduma halor ki jingshah pynngat kyndon jongki. Kine ki long I Dr Ampareen Lyngdoh na East Shillong, bah Teibor Pathaw na Mawlai bad u Thomas Sangma na North Tura.
Ka NPP ka la hap ban leh ïa kane namar ka dei ka hukum kaba la wan na ka Election Commission of India (ECI) ba kino kino ki party kiba pynïakhun ïa ki kyrtong kiba shah pynngat kyndon ki dei ban pynshai sha ki paidbah balei ba ki hap ban pynïakhun da kitei ki kyrtong.
ïa I Dr Ampareen la register case da ka CBI naduh u snem 2020 halor ka kam tah siah lieh bad la pynngat ha ki kyndon 120 B, 420,467,468,471,201 IPC bad Section 12 (3) PC Act. Ka jingbishar ïa kane ka dang ïaid bad ym pat don kino kino ki sakhi sabut ban pynshisha ïa ka jingdonkti jongi.
\ Kumta ka NPP ka la pynshai ba namar ba i dei iba pynlut ïa ka por bad bor ha kaba shakri ïa ki paidbah bad ka dei kaba don burom ha ka imlang ka sahlang, iba la trei shitom bha ha ka por jongka jingpang khlam COVID ruh,nalor kata ki jingkynnoh ki dang dei tang ki jingkynnoh ïa kiba ym pat shym la shah rai pynrem ha ka ïing bishar kumta ka party ka shem ba i long iba tbit ban ïa aireng na ka NPP ha kane ka election MLA ban jied nongmihkhmat ha ka 27 Rymphang 2023.
U bah Teibor Pathaw pat u la shah pynngat kyndon 420,406 IPC C.R.No 38(S) 2017 bad ka mukotduma ka dang sahteng ha ka ïing bishar Chief Judicial Magistrate. Une u la shah pynngat kyndon ha ka CBI namar ka don ka jingshah ujor ba ma u lem bad arngut ki heh ka NEIGRIHMS ki khlem siew ïaka pisa Employeers Provident Fund (EPF) kaba ki nongtrei jongu ki dei ban ïoh.
Ka NPP ka la pynshai ba u bah Teibor u dei uba la trei bha na ka bynta kiba duk bad uba trei bha na ka bynta ki paidbah kumta namar ba ym pat don kano kano ka jingshah rai pynrem na ka ïing bishar ba ka jingbishar ka dang ïaid shakhmat kumta ka party ka la ibit ban pynïakhun ia u na ka Mawlai Constituency.
Uba lai uba la shah pynngat kyndon bad ka jingbishar ka dang ïaid u dei u Thomas Sangma na North Tura. Une u la shah pynngat kyndon 376 r/w Section 506 IPC Sadar P.S Case No 156(6) 2021. ïa une ruh ka NPP ka la pynshai ba namar ba ka jingbishar ka dang ïaid bad ki jingkynnoh ki long ki bym don nongrim bad namar ba u dei uba la shakri bha ïa ki paidbah kumta ka NPP ka pynïakhun biang ïa u ha kane ka kynti na katei ka constituency.

Leave A Reply

Your email address will not be published.