Ki seng riewlum ka jylla kim don budlum satia, ka thong jong ki ka long beit tang ban don ha ka Sorkar: Ardent
>> Lada ka jingtreikam ka MDA ka long kaba ihun ngin ym pynkha ïa ka VPP >> Ka APP ka ïoh buit na ngi halor ka Clean Politic
Shillong, K’lyngkot 22: U President jong ka VPP u Bah Ardent M Basaiawmoit u la ong ba ka jingpheil jong ka seng riewlum baroh ban ïeng ha ka nongrim kaba ki la seng bad ka jingkloi jong ki ban ïapeiñ ïa ki nongrim jong ki tang ban don beit ha ka liang ka sorkar ka pynlong ïa ki riew rangbah bad ki khraw pyrkhat ban wad da kiwei ki lynti bad kata ban pynkha ïa ka seng riewlum kaba thymmai kaban kren ïa ki nongrim kaba kine ki seng riewlum kiba la slem ki la ieh shrah noh.
Haba ïakren bad ki lad pathai khubor u Bah Ardent u la ong ba ka jingmih ka VPP ka dei hadien ba ki seng baroh kim pushe shuh ïa ka nongrim kaba la seng ïa ki ha kata ka jingkhwan bor palat.
“Phin peit ki seng riewlum baroh kim don budlum shuh bad ki kloi bha ban ïapeiñ ïa ka nongrim tang ban don beit bad ka sorkar bad dei na kane ka daw hi ba la pynkha ruh ïa ka VPP kata ban pyndap ïa ka jaka ba thylli namar ka jingbym don seng riewlum shuh ba ïeng ha ka nongrim,” u la ong.
Haba kylli pat halor ka jingtreikam ka sorkar MDA u Bah Ardent u ong ba ka long ka jingtreikam kaba lymmuh bad khlem tip shano ban jam namar la shu kthong beit ïa ka jingmyntoi shimet ki nongsynshar.
“Lada ngi ihun ïa ka jingtreikam ka sorkar MDA ngin ym pynkha satia ïa ka VPP,” u la ong.
Haba kylli pat la u don ne em ka jingangnud ban don noh tang kawei ka seng riewlum ha ka jylla bad la un pyrshang ne em ban pynïatylli ïa ki seng riewlum, u Bah Ardent u la ong ba um kwah ban shu ïa tylli tang na bynta ka jingjop elekshon um sngew kwah ban tylli ki seng riewlum.
“Ban ïatylli tang shuwa ka elekshon ngam kwah bad lada dei ba ka don shisha ka jingkwah ïa tylli ka dei halor ki nongrim bad ka thong treikam na bynta ka jingmyntoi u paidbah ym tang ban ïa tylli ban jop elekshon,” u la ong.
Haba kylli pat halor ka jingpynkha jong u ïa ka VPP ka dei mo ka buit ba u la shim kylliang na ka Aam Aadmi Party (APP) ha Delhi u Bah Ardent u la jubab, “Ym dei ba ngi shim kylliang na ka AAP hynrei dei ka AAP kaba shim kylliang na ngi halor ka Clean Politic. Ngi ryngkat bad ka kynhun naduh u snem 2010 ngi la sdang ïa ka jingïalap ba donkam ïa ka Clean Politic hynrei ka AAp lei ka sdang ha u 2011 hynrei ki paidbah hangtei ki kham kloi ban sngewthuh ïa ka jingdonkam ka synshar kaba khuid ha kaba ka AAP ka la ïoh synshar mynta la ar term ha Delhi.”