Shillong, Naiwieng, 16: Ka Joint Action Committee (JAC) jong ka NEHUTA, NEHUNSA bad NEHUSU ha ka sngi Palei ka la rai ban pynsangeh shwa shipor ïa ka jingïakhih kaba khlem pud sngi hadien ba u Vice Chancellor ka NEHU u Prof. P.S Shukla u la pan por san sngi ban bishar shwa ïa ki jingdawa bad kynthup ka jingdawa ban weng kam ïa u Technical Advisor/Senior Consultant.
Hadien ka jingïalang, u Chaiarman jong ka JAC u Prof Lakhon Kma u la ong, “ngi la rai ban pynsangeh shwa shipor ïa ka jingïakhih bad naduh lashai ki klas kin long biang kumba ju long, ki nonghikai kin sa leit phai biang sha ki kamra klas bad ki nongtrei kin sa leit phai biang sha ki ophis treikam.”
U la ïathuh ba la shim ïa kane ka rai hadien ba u Vice Chancellor u la kyrpad da kaba pan por san sngi ban bishar ïa ki jingdawa ba la buh da ka JAC kaba kynthup ruh ïa ka jingdawa ban wengkam ïa u Rohit Prasad uba trei kum u Technical Adviser/Senior Consultant jong kane ka skulbah.
Ka jingïalang ka la long kaba jop watla u Vice Chancellor um shym la pyni ïa ka shithi ba la wengkam ïa u Prasad.
U Prof Kma u la pyntip ruh ba u VC u la mynjur ban thaw ïa ka komiti ka ban peit ïa ka mat kaba ïadei bad ka Marking System bad ka jot ka pei jong ki Hostel bad ka koit ka khiah.
“U VC u la ailad ha ki samla pule ban jied ïa u Chairman u ban khlieh ïa ka komiti ka ban peit ïa ka jingdawa bad ban khmih bniah ïa ka marking system jong ka skulbah,” u la ong.
U la bynrap ruh ba u VC u la kular ban leh eiei halor ka jingdawa ban thung Statutory Officers bad ki University Engineers khnang ban pynduna ïa ka jingkit bakhia jong ki nonghikai bad ki nongtrei na ki kamram.
Halor ka jingdawa ban khmih bniah halor ka bhah pule jong kiba dang sahdien, u Prof Kma u la ïathuh ba u VC u la mynjur ban thaw ïa ka Komiti ïa kaba yn sa shim rai da ka Academic Council halor ka jingthung Chairman bad ki dkhot.
“U VC u la kular ïa ka JAC ba ka jingïalang jong ka Academic Council kan sa long ha ka taiew banyngkong jong u bnai Nohprah ha kaba ïa kine ki mat yn sa ïathir ïatai bad yn sa shim rai ruh ha kane ka jingïalang,” u la bynrap.
Ha kaba ïadei bad ka jingpynrung ïa ki samla pule kum ki dkhot jong ka Academic Council (AC), u general secretary jong ka NEHUSU u samla Banpynbiang Riang u la ong ba u VC u la mynjur ban ailad ïa ki samla pule ban mihkhmat sha ka Council.
“Halor ka jingdawa ban pynlong ïa ka Convocation, u VC ula pyntip ba mynta u snem ka skulbah kam shym la lah ban pynlong namarba ka dang ap ïa ka jubab na ka President jong ka ri India hadien ba kane ka skulbah ka la khot sngewbha ban ïashim bynta lang ha ka jingrakhe ïa ka jingdap 50 snem jong ka skulbah NEHU,” la bynrap u nongïalam ka NEHUSU.
U la pyntip ba u VC u la kular ruh naduh u snem ban sa wan kan sa don ka jingbuh tarik na ka bynta ka skulbah ba kan pynlong ïa ka Convocation manla u snem.
