La khang ïa ki dukan ban die ïa ki ktang pait ba pyndait hi ha ki thuk thuk bad kali
Shillong, Naiwieng, 16: Ka District Magistrate jong ka East Khasi Hills District ka Kong Rosetta Mary Kurbah ha ka 13 tarik mynta u bnai ka la pyntreikam ïa ka iktiar ba la pynkupbor hapoh ka Section 144 Criminal Procedure Code (CrPC) kaba la mana ban pyndonkam ïa ki Horn kiba pynmih ïa ka jingsawa kaba jam shaba palat, ban die paidbah ïa ki tiar jingrwai kiba ym lah ban tehlakam ïa ka jingpynsawa, ban pynpah Horn ha ki jaka ba la pynbna kum ki Silence Zones (kata ym duna ïa ka 100 mitar na ka jingdon jong ki Hospital, ki jaka pule, ki iingkashari, ki jaka mane Blei), ban pynphah Horn ha ka por mynmiet hapdeng ka por 10:00 baje mynmiet haduh 6 baje mynstep ha ki jaka sah briew hynrei lait noh haba don kino kino ki khep ba donkam kyrkieh, ban pynpah ïa ki Air Horn da ki kali kit ñiut hapoh ka Section 179 (1), 190 (2) bad 194 F jong ka Motor Vehicle (Amendment) Act, 2019.
Katkum kane ka hukum, ka District Magistrate ka la maham ïa ki dukan bad ïa ki Workshop kiba die ïa ki Duplicate ne ki ktang pait (Replica Exhaust Pipes) ba kim dei shuh ban dang die nangne shakhmat hynrei lym kumta kin ngat ha ka jingshah daiñ kuna hapoh ka Motor Vehiciss Act bad kiwei kiwei de ki aiñ.
Ka District Magistrate ka la mana ruh ba ki paidbah kiba pynkheiñ ïa kane ka hukum kin shah pynsajia hapoh ka Section 188 jong ka Indian Penal Code (IPC).
Ka la pyntip ba ka jingpyntreikam ïa kane ka hukum ka long hadien ba ka Sorkar Meghalaya lyngba ka Transport Department ka la pynmih ïa ka jingpyntip ha ka 4 tarik, Nailar 2023 kaba khang ban pyndonkam ïa ki Horn kiba pah huleng, kaba pyndait ïa ki Silencer kiba sawa bad kiwei kiwei ki tiar kali palat ïa kaba la ai jingbit hapoh ka Rule 119 (2) bad Rule 120 (2) jong ka Central Motor Vehicles Rules 1989 bad ka Section 52 jong ka Central Motor Vehicles (CMV) Act khnang ban tehlakam da ka aiñ bad ban pynduna ïa ka jingpynpah Horn jong ki kali bad ki thuk thuk kiba ktah ïa ka koit ka khiah jong ki birew bad ki paidbah nongshong shnong.
Namarba kane ka kam ka long kaba kyrkieh, ka District Magistrate ka la pyntip ruh ba kane ka hukum kan treikam noh mardor tad haduh ban da pynbna da kumwei pat.