Shillong, K Lyngkot 19: Ka jingïalang ba la pynlong da ka KHADC kaba la khot da ka Dorbar Iktiar Paitbah ba la khot pynlong da ka Khasi Hills Autonomous District Khasi ha madan Polo Shillong la ïohi ïa ka jingtuid jong ki paidbah ba kynthup ïa ki rangbah kur, ki nongïalam seng samla, ki seng kynthei, ki synjuk bapher bapher ki ba don ha ka bri u Hynñiewtrep.
Ha kane ka jingïalang la wan ban ïashimbynta da u Lat ka jylla u C H Vijayashankar ban long kum u kongsan, u Bah Prestone Tynsong kum u symbud kongsan, u Bah Titostarwell Chyne kum u nongïalam ka liang ïatei ha KHADC, ki EM incharge jong ka KHADC, ki nongïalam ka synjuk ki nongsynshar shnong ka Bri u Hynñiewtrep, ki nongïalam ki seng longkmie seng kynthei, ki rangbah kur bapher bapher nalor kiwei kiwei pat.
Ha kane ka sngi na ka liang u Bah Pynïaid Sing Syiem CEM ka KHADC u la ong ba kane ka dei ka sien ba nyngkong ba ka jylla ka ïoh ïa u Lat uba lah ban pynïajan ha ka jingïatreikam.
U la ong ba don haduh 54 tylli ki Elaka bad palat san hajar tylli ki shnong ki ba hab hapoh ka jingpeit jingkhmih ka KHADC. Hapoh kine ki elaka bad ki shnong ki don ki sengkynthei seng longkmie, ki seng samla, ki seng kur.
Halor kane u la pynbna ruh ïa ka notification ba la pynbna ha ki it ki Hima, ki elaka kiba hapoh u pud u sam ka Khasi Hills Autonomous District Council Shillong ba katkum ka Khasi Hills Autonomous District Administration of Elaka Amendment act 2023 la ithuh ne pynkupbor ïa ki rangbah shnong, sordar shnong, rangbah dong, seng kynthei seng longkmie bad seng samla, ba kin don ha ki shnong bad katkum ka jingpynkup da katei ka aiñ.
Kum ka dak ka jingpynlait paitbah ïa kane ka aiñ u Bah Pynïaid Sing Syiem u la aiti kopi ïa kane ka act sha ki nongïalam jong ki seng rangbah shnong, sordar shnong, rangbah dong, seng kynthei seng longkmie bad seng samla, bad u Bah Pynïaid Sing Syiem u la pynbna ba naduh kane ka sngi la ithuh ne pynkupbor ïa ka jingtreikam jong ki rangbah shnong, sordar shnong, rangbah dong, seng kynthei seng longkmie bad seng samla, jong baroh kiba don ha ka ri Khasi kiba hab ha u pud u sam ka KHADC.
Ha kane ka sngi la bthah ïa ki sengkur kur ba katkum Khasi Hills Autonomous District Khasi Social Custom of Linage act 2023 la ithuh bad la pynkupbor ïa baroh ki Dorbar ki sengkur, ki rangbah kur. Kumjuh ruh ba kin register ha ka ophis u registrar jong ka KHADC Shillong.
U Lat ka Jylla u C H Vijayashankar haba kren ha kane ka sngi u la pynpaw ïa ka jingsngew kmen ba u la ïoh ban shim bynta ha kane ka jingïalang pynkupbor paidbah ka Dorbar Itiar Paidbah kaba pynpaw ïa ka jingaiti lang ban kyntiew pynbha pynmiat ïa ki shnong ki thaw.
La ong ruh ba ka jingithuh kyrpang ïa ka Jylla Meghalaya ka dei halor ka jingshim jait na ka Kmie, kaba long ka nongrim jong ki jaitbynriew Khasi-Jaiñtia bad Garo, ka rukom ai burom ïa ki kmie bad ki kynthei na ka bynta ban pynthikna ïa ka jingbteng jong ki Riti Dustur ba riewspah jong ka jaitbynriew.
“Nga la sngew ba nga long uba donbok ban ïoh ban ai ka jingmynjur ïa kine ki artylli ki aiñ ki ba kynthup ïa ka Khasi Hill Autonomous District (Administration of Elaka) Amendment Act 2023 bad ka Khasi Hill Autonomous District (Khasi Social Custom of Linage) Amendment Act 2023. Kaba long ka jingpynshisha ïa ka jingpynkupbor ïa ki tnat treikam ba hapoh jong ka imlang sahlang,” ong u Lat.
Na ka liang jong u Lat u la bynrap da kaba ong, “Nga kyrpad ïa uwei pa uwei u nongshong shnong ban sumar bad ïada ïa ka pateng bad ki Riti Dustur, Ki Autonomous District Council ki long ki nongsumar ïa ki Riti Dustur bad ka rukom synshar jong ngi. Nga kyntu ïa ki Nongïalam ADC, ban ïatreilang bad ka sorkar jylla ban kohnguh ïa ki Riti Dustur bad ka jingkiew shaphrang kaba long kaba donkam na ka bynta ka roi ka san baroh kawei jong ka jylla”.
