Shillong, K’ Lyngkot 19: Ka IIM Shillong ka la pynlong ïa ka jingïasyllok ha kaba ïadei bad ki jingeh na ka jingbret ñuit pathar bad kumjuh ruh kumno ban ïakhun ïa kane ka jingeh kaba mih manla ka sngi ha kane ka thaiñ. Ïa kane ka prokram la pynlong da ka NE-CCIE (Northeast Centre for Community Impact and Engagement), IIM Shillong, ha kaba ka la wan lam lang ïa baroh ki riew shemphang kaba kynthup ïa ki nongmih khmat na ka Meghalaya Institute of Governance, Bethany Society, OCU, bad ka Synjuk ki Nongsynshar Shnong Nongthymmai Pyllun, ba kin ïa don bynta lang ha kane ka jingïakren kaba don jingmut ha kaba ïadei bad ka jingbret nuit pathar kaba dei kaba kongsan bha hapoh ka nongbah Shillong.
Ïa kane ka jingïalang la plie da u Prof. D P Goyal, Director, IIM Shillong, uba la pdiang sngewbha ïa baroh kiba ïa shim bynta bad uba la ban jur halor ka jingdonkam ban bret ïa ki ñuit ha ka rukom kaba dei khamtam ha ki jaka sor.
Na ka liang jong u, ula banjur ruh halor ka jingdonkam ka jingïatreilang hapdeng ki jaka pule, ki tnat sorkar bad kumjuh ruh ki nongïalam shnong ha kaba ïadei bad kane ka bynta. U Col. Dinesh Adhikari, CAO, IIM Shillong u la pyni ruh ïa ki lad ki lynti ba la shim da kane ka jaka pule ha kaba ïadei bad ki kam jong ka jingbret nuit, kaba kynthup ruh ïa ki lad ki lynti ba la shem thymmai kiba don kam ban pyntreikam hapoh kane ka jaka bad khamtam ha kane ka nongbah Shillong.
Shuh shuh ïa kane ka jingïasyllok la nang batai shuh shuh da Dr. Teidorlang Lyngdoh, Chair, NE-CCIE, uba la batai halor kine ki jingdonkam bad ki jingnoh synniang kiba don jingmut kiba wan na ki nongïashim bynta.
Ha kane ka jingïalang la iakren ruh halor ki kam kiba donkam ha kaba ïadei bad ka jingmih na kine ki kam khamtam kumno ban ïakhun ïa kane ka jingeh kaba la long ka kam kaba kongsan bha ha kane ka por kaba mynta khamtam kaba don ka jingkyrshan na ki nongthaw aiñ.
Ki kam kiba la ïakren ha kane ka sngi ki kynthup ïa ka Waste Segregation and Public Awareness, ka Water ATMs for Clean Drinking Water, Community-Driven Solutions, ka Stewardship of Rivers, ka Recycling and Repurposing Waste, ka Promoting Commercialization ka Supportive Government Policies, ka Pilot Projects and Data Collection, ka jingïatreilang bad ki sengbhalang bad ki riewshemphang bad kumjuh da ka jingïatreilang bad ka Bethany Society ka Synjuk ki Nongsynshar Shnong Nongthymmai Pyllun bad kiwei kiwei.
