Sakhi ki hajar ki paidbah riewngiet ka balang Katholik ha ka jingpynkyntang Lyngdoh Sohblei ha Mawkyrwat Parish
Mawkyrwat, K’lyngkot 02: Ka Parish Nativity of Our lord Mawkyrwat ha ka 31 tarik u Nohprah, 2023 ka la pynkut noh ïa ka jingrakhe ïa ka Jubili Ksiar ne ka Golden Jubilee jong ka ryngkat ka jingpynkyntang Lyngdoh Sohblei ïa ki ar ngut ki Dikon kata u Marshall Wahlang na Mawkyrwat Parish bad ïa u Phrangsngi Lyngkhoi na Rangblang Parish da u Most. Rev. Wilbert Marweiñ, D.D, Bishop jong ka Nongstoiñ Diocese ryngkat ka jingsakhi lang da ki hajar ngut ki paid riewngiet ka balang Roman Catholic.
U Most. Rev. Wilbert Marweiñ, D.D, Bishop jong ka Nongstoiñ Diocese haba kren ha kane ka sngi u la pynpaw ïa ka jingsngewkmen ban ïohi ba ka Mawkyrwat Parish ka la kiew ha bun ki bynta khamtam ha ka jingim ba kynja mynsiem ban ai jingshakri ïa u Blei.
Shuh shuh u la ong ruh ba kum ki paid riewngiet ki donkam ban peit sha khmat khamtam mynta u snem jong ka jingpynkut ïa ka Jubili Ksiar jong ka Parish Mawkyrwat. “Ngim dei ban klet ïa kaei kaba ngi la ïaid lynti hynrei ka la dei ka por ba ngin ïaid bad peit sha khmat, bad ha ki sngi ki ban wan, kumno ngin leh ban pynkhlaiñ ïa ka jingim mynsiem”, ong u Most. Rev. Wilbert Marweiñ.
Haba ai jingkyntu ne jingaimynsiem halor ka jinglong Lyngdoh Sohblei, u Most. Rev. Wilbert Marweiñ u la ong ïa ki Lyngdoh bad ki riew niam la jied ban long ki nongduwai, namar kane ka dei ka kamram kaba nyngkong eh jong ki riew niam, man ka sngi ki pyndep ïa ki jingduwai na ka bynta ki paid jong U Blei. U la ong ruh ba la jied ïa ki ban long ki Nongïalam, kynmaw ba ki la poi ha ka duwan ban long ki nongïalap, la jied ïa ki ban leit ïalap, ban pynbna ïa ka khubor jong ka jingpynim.
Haba bynrap shuh shuh ïa ka jingkren, u Most. Rev. Wilbert Marweiñ u la ong ba ha ka ktien jong U Blei don ka jingim bymjukut. Namarkata, U Blei U la khot ïa baroh ban long ki nongïalap naduh ba ki ïoh ïa ka baptisma hynrei kham kyrpang ïa ki Lyngdoh bad ki riew niam. “La jied ïa ki riew niam ban long ki nonghikai, ymdei ban hikai tang ha skul hynrei ki long ki nonghikai ha ka lynti ka hok, la sot bad ïalam ïa ki briew sha U Blei”, pynkut u Most. Rev. Wilbert Marweiñ ïa ka jingkren.
Ban pynkut ïa kane ka jingrakhe ïa ka Jubili ksiar jong ka Parish Mawkyrwat ha kane ka sngi la pynhiar noh ïa ka Lama Jubili da u Most. Rev. Wilbert Marweiñ bad ruh la pyllait ïa ka Souvenir jong ka lynti ïaid jong ka Parish Mawkyrwat ha kine ki san phew snem ba la dep.