Nongpoh, K’lyngkot 02: Kumba ka pyrthei ka la kynjoh sha ïa ka jingïaid lynti jong ka jingim sha uwei pat u snem ba thymmai, kata u snem 2024 ba la rakhe ha shi tyllup ka pyrthei, ka Ri Bhoi Dorbar kum kawei na ka kynhun ki riew rangbah ka la shim ïa ka kabu ban ai khublei snem thymmai kaba kyrpang ïa baroh ki paidbah ka Ri Bhoi bad kumjuh ruh ïa ki paidbah ka jylla hi baroh kawei.
Kumba la pynpaw da u President ka Ri Bhoi Dorbar, u Bah R.B Shadap, u la ong ba ka Ri Bhoi Dorbar ka dap da ka mynsiem jong ka jingkmen ba ngi la kynjoh sha u snem ba thymmai ha ka jingïaid lynti jong ka jingim bad ka Ri Bhoi Dorbar ka shim ruh ïa ka lad ka kabu ban ai khublei snem thymmai ïa baroh ki paidbah ka Ri Bhoi bad ïa ki paidbah ka jylla hi baroh kawei ba une u snem 2024 un long u snem uba ngin ioh pdiang shibun ki jingkyrkhu bad ki jingkylla na ka bynta ka bha ka miat ka ban kyntiew ïa ka hok longbriew ka man briew ha sla jong kane ka pyrthei.
Kum ka khubor jong u snem thymmai 2024, u Bah R.B Shadap u la pynpaw ruh da kaba ong ba ka Ri Bhoi Dorbar ka phah ïa ka khubor ban ai khublei kyrpang naduh ki nongmihkhmat paidbah, ki ophisar sorkar, ki nongïalam ñiam, ki nongïalam seng bhalang bad baroh ki riew rangbah, ki samla ki samhoi, ki longkmie ki longkpa bad kumjuh ruh ki paidbah ban don kata ka mynsiem jong ka jingïatrei lang ha une u snem 2024, namar da ka jingïatrei lang lah ngin lah ban kyntiew ïa ka bha ka miat, ka shongsuk ka shongsain bad ka roi ka par jong ki paidbah ha ka District hi baroh kawei, u la bynrap.
