Kylla ka Trok ba shah tynrah ha ka trok ha Ri Bhoi, mynsaw u Dribar, phet krad pat uwei u dribar

Nongpoh, K’lyngkot 02: Ha kawei na ka jingjia ïa tyngkhuh kali ha Ri Bhoi, kawei ka Trok ka la kylla ha surokbah hadien ba ka la shah tynrah kynsan kynsan da kawei ka trok ha ka por ba ka dng ïaid ha ka surokbah ha National Highway-6 ha Ri Bhoi District.
Kane ka jingjia ka la jia hynnin ka janmiet jong ka 1 tarik u Kyllalyngkot 2024 ha ka por 6 baje ei ei janmiet, ha Shangbangla ba hap ha ka surokbah National Highway-6 ha Ri Bhoi.
Kumba la ioh lum jingtip la ong ba ka trok kaba don ïa u Number AS01 JC3752 kaba kit Simen ka la shah tynrah ha kawei ka trok kaba don ïa u number AS01 PC2015 katba ka dang wan na Guwahati ban kiew sha Shillong haduh ba katei ka trok ba kit Simen ka la kylla syndon ha katei ka surokbah.
La kynnoh ruh ba kane ka jingjia ka la jia ka dei na ka daw ka jingñiah khlem akor utei u dribar ka trok ba wan na Guwhati sha Shillong ha kaba u la pynher sted bha ïa ka Trok kaba u ñiah, hynrei hadien ba la jia katei ka jingjia u la phet krad noh ïa lade na katei ka jingjia.
La ïathuh ruh ba u Dribar jong katei ka trok ba kit simen u la mynsaw jur bad la rah noh sha Civil Hospital Nongpoh ban ioh ïa ka jingsumar. Na kane ka jingjia ka la wan rah ruh ka jingdheng ki Kali haduh ba hap ban pynïaid noh tang shiliang ka surok ba katei ka surok ba leit sha Guwahati ka la wan rah ka jingdheng kali na ka jingkylla katei ka trok kit simen.
Halor kane ka jingjia, la ioh jingtip ruh ba ki bor pulit ka Ri Bhoi ki la pynlong ïa ka jingtohkit halor kane kane ka jingjia bad ryngkat ki nongtrei ka NHAI ki la pyrshang ban pynïaid beit ïa ki Kali paidbah khnang ban lait na ka jingdheng ïa ki Kali paidbah kiba ïaid ba ieng lyngba kane ka surokbah National Highway-6 ha Ri Bhoi District.