Plie u bah Carness Sohshang ïa ka Phod Rai Rai ka jaka jngohkai ba itynnad ha M3K

Mawkyrwat, K’lyngkot 02: U bah Carness Sohshang u MDC jong ka Mawkyrwat Constituency bad kum u EM ka Khasi Hills Autonomous District Council (KHADC) u la ïoh ban plie paidbah ïa kawei na ki jaka jngohkai ne jaka leit kai pyngngad ka Phot Rai Rai ha Shnong Mawranglang Lai Kyntoit, South West Khasi Hills District.
Ïa kane ka jaka jngohkai la pyntrei na ka skhim MGNREGS ryngkat na ka Rurban Mission kaba dei jong u snem 2017 ha ka jingmang pisa kaba 60 lak tyngka ei ei hynrei na ka daw jong ki jingeh kiba bun ym shym la lah ban pyndep ha ka por kaba biang. Hynrei da ka jingshimkhia jong ka Dorbar Shnong ryngkat ka jingïatreilang jong ki paidbah nongshong shnong ki la lah ban pyndep ïa ki jingdonkam baroh bad ha ka 23 tarik u Nohprah, 2023 la ïoh ban plie paidbah noh.
U bah Carnes Sohshang haba kren kum u kongsan u la ong ba da ka jingdon ki jaka jngohkai ba itynnad hapoh jong ki shnong kan sa long kawei ka lad ka lynti ban pynriewspah ïa ka shnong ka thaw, ka thaiñ bad ïa ka ri Khasi baroh kawei namar kumba ka Sohra ka dei kawei ka jaka ba ki briew ki tuid ban leit kai pyngngad bad kyrmen skhem ba kane ka Phod Rai Rai ruh kan sa long kawei ka jaka kaba lah ban khring ïa shibun ki briew kiba kwah ban wan sakhie hi da la ki jong ki khmat katne ka jing-i-tynnad jong kane ka jaka.
Na ka liang u bah Roland Marweiñ, Myntri Shnong Mawranglang Lai Kyntoit u la pyntip ruh ba ha kaba ïa dei bad ki jingpynïaid shaphrang ïa kane ka jaka jngohkai kum ka shnong ka la aiti ha kawei na ki tnad komiti kata ka M3K Tourism Committee bad kumjuh u la ong ba ïa kiba wan kai pyngngad ha kane ka jaka kan don ruh ka bai rung ne ka Entry Fee.
Ha kane ka sngi la ïa donlang u bah Roland Marweiñ, Myntri Shnong Mawranglang Lai Kyntoit, u bah Roning Lyngdoh, Secretary M3K Tourism Committee, lem bad ki paidbah jong ka shnong.