Shillong, K’lyngkot, 02: Ka Seiñ Raij Niamtre Shillong ha ka 30 tarik u bnai Nohprah 2023 ka la pynlong ïa ka jingpynkupburom ïa ki khun ka Seiñ Raij Niamtre kiba la pas bha ha ki eksamin bad ha ki kyrdan jingpule bapher bapher kaba la long hapoh ka Dorbar Hall jong ka Seiñ Raij, Qualapatty Shillong, ban kynmaw ïa ka lyngkhuh sngi khlad ba 161 u khla wait ka jaidbynriew uba na Rilum Jaintia u Kiang Nangbah.
Haba ai jingkren kum u kongsan ha katei ka sngi, u Bah Vincent Pala, MP ka Lok Sabha, u la ong ba ha kane ka lyngkhuh sngi ïap ba 161 jong u Woh Kiang Nangbah ha kaba une u riewkhraw u la ïehnoh ïa shibun bah ki nongmuna kiba ka pateng ba mynta ka dei ban bud nuksa.
U la khot la wer ruh ïa ka jaidbynriew ba kan sei ïa ki nongïalam kiba kynsai kiba jied hok ban shakri ym kiba biej spah ne sbai Rupa.
U la kyntu ruh ïa ki samla ba kin buddien ïa ki dienjat jong u Woh Kiang Nangbah ha ka jinglong shlur bad ka mynsiem ban ïarap lem iwei ïa iwei bad u la ai ka jingïaroh ruh ïa ka Seiñ Raij Niamtre Shillong kaba lah pynlong ïa kane ka jingpynkupburom ïa ki samla kiba la leh bha bad pas bha ha ki kyrdan bapher bapher.
Haba kren shaphang ka jingim u Kiang Nangbah u Bah M Belbin Kyndiah u la ong ba ka por bad ka samoi ba la phah ïa u Kiang Nangbah ka dei kaba la la saiñ dur da ki blei bad ka jingsei ïa u kum u nongïalam ka thma ban ïakhun ruh kam dei ka mon briew hynrei dei lyngba ka hukum blei ha ryngkat ka sakhi kiba bun bah.
U la ong ba u Kiang Nangbah u la mad ïa ka jingshah shet kylla bad shah kem bad pynïap hynrei ki dienjat ba u la ieh ki sakhi ïa ka mynsiem ba shynrang jong u.
