Sah tang ka nam ka jingpynbna ophis Block ka Sorkar MDA ha Rambrai bad Nonglang

Nongstoiñ, Risaw 16: Ha ka por ba u Conrad Kongal Sangma Myntri Rangbah ka jylla u la wan ban plie ïa ka Rambrai C&RD Block ha ka 9 tarik Naiwieng 2022, ki paitbah ka thaiñ ki la dap da ka jingsngewkmen, namar ki da kyrmen skhem ba ïa baroh ki kam sorkar kiba kiba dei ban pyntrei lyngba ka Block Ophis, kim donkam shuh ban pynlut por ban leit haduh Nongstoiñ, namar ba ka Block ophis ka la don ha Rambrai.
Phewse la palat ar snem tam haduh mynta u Block Development Officer ba pura um pat don, hynrei dang hap ban peit da ki ophisar MCS na Nongstoiñ. Kumta ka la buh jingeh haduh katta katta ïa ki paitbah ka thaiñ.
Na ka liang ki nongïalam ka FKJGP Rambrai circle hadien ba ki paitbah ki la ud ki la nam na ka por sha ka por, ki la pan jingshai ruh lyngba ka Right to Information Act 2005 na u Block Development Officer ka Nongstoiñ, u ba dei ruh ha kajuh ka por kum u Public Information Officer. Lyngba ka jingwad jingtip, ki la ïoh pdiang ïa ka jubab kaba biang kaba la pyni shai ba katei ka Block kam pat don ïa u BDO ba pura u ban peit ïa katei ka Block.
Nalorkata katkum ki jingtip ba ka seng ka la ïoh pdiang lyngba ki kot ki sla, ki pyni ba ka sorkar ka la dep thung kumba khatar ngut ki nongtrei ki ban peit ïa ki kam pynroi jong ka sorkar kiba dei ban pyntrei lyngba ka Block Office, kum ka jingpyntrei ïa ka skhim shispah sngi (MNREGA) bad ka skhim PMAY G.
Kitei ki khat ar ngut ki nongtrei kiba ka sorkar ka la thung na ka byta ban peit ïa ki hynriew tylli ki G.S circle ka Kyrshai, Mawdoh, Mawlieh, Mawthir, Mawdet bad Rambrai ki don hynriew ngut ki Data operator bad hynriew ngut ki Technical Assistant.
Halor katei ka jingud jingnam jong ki paitbah, ki nongïalam ka seng ki la leit ban jurip ïa katei ka Block ophis. Hynrei ki la lap ba ym don nongtrei wat tang uwei ruh bad wat ka signboard jong ka Block ruh kam don satia lait tang u maw kyrteng ba la buh ha ka por ba la wan ban plie ïa katei ka ophis.
U bah Jiedstarland Lyngkhoi president ka FKJGP Rambrai circle haba ïakren bad u nongthoh khubor, u la pynpaw ïa ka jingsngewkhia halor ka jingpynsahteng jong ka sorkar ban tei da ka ophis ba pura jong ka Block.
U la pynpaw ruh ïa ka jingsngewdiaw ïa ka jingbym don u BDO ba pura bad ka jingbym shimkhia jong ki nongtrei kiba ka sorkar ka la dep thung ïa ka kam kaba la bynshet ha ki. Namar ka jingujor ki paitbah sha ki nongïalam ka seng ki la ong ba ki don ki nongtrei kiba wan tang shisien shitaïew kata tang ha ka sngi ïew Rambrai.
U la ong ruh ba ka jingwan jong kitei ki nongtrei tang shisien ha ka shi taïew ka buh jingeh ïa ki paitbah lada ki don kam kyrkieh ha ki sngi ki bym dei sngi ïew.
Ha kajuh ka por u la kyntu ïa ka sorkar ba ka dei ban pyntreikam pura noh kloi ïa katei ka Block, namar ka jingdon jong ki nongtrei ha Block Ophis, ka pynjan ïa ka jingïadei jong ki paitbah bad ka sorkar ym tang ha ki kam pynroi bad lad ai jingïarap.
Haba pyrshang ban twad jingmut na ki paitbah nongshong shnong katei ka thaiñ, ki la ong ba katkum ka jingtip ki la don ar tylli ki jaka kiba ki bor sorkar ki la phah ïa ki briew jong ka ban leit sorjamin na ka bynta ban tei ïa ka Block ophis. Hynrei haduh mynta kim pat ïoh jingshai satia ha kano ka jaka ka sorkar kan tei ïa ka Block ophis.
Kiba bun ki pynpaw ruh ba kane ka sorkar MDA ba ïalam da ka NPP ka dei ka sorkar kaba thok ba shukor bad pynbiej paidbah. Namar haba la jan elekshon ka kloi ban pynbna ki Block bad leit plie kylleng, hynrei kita ki Block kim shym la treikam ei ei, ym pat tei building ei ei haduh mynta mynne. Ka jingkylli ka long haba ym don briew ba trei ha kine ki Block ïano siew tulop bad shano ka pisa ka leit.
Lah ban kdew hangne ba dang ha ka sngi balang u myntri rangbah u kloi ban hiar shaduh Umsohpieng, na ka bynta ban leit plie ïa ka building skul ba thymmai ba la kner lyngba ka NEC. Hynrei, um patiaw ei ei ïa ka Rambrai bad Nonglang Block kiba u la plie naduh u 2022.
Lah ban pynkynmaw ruh ba dang ha ka sngi hat majai jong ka taiew, ki paidbah ka thain Nonglang, ki la tur sha DC ophis ban pyrshah halor ka jingdon ka jingthmu ban pynkynriah noh ïa ka Block na Nonglang sha Tynghor. Ki paidbah ki buh jingkylli ruh ba hato don daw aiu, kiei kita kiba thmu leh donbor, haba ïa ka Block ba la dep plie maw sah nam bad pynskhem ha Nonglang, yn leh jubor ban rah sha Tynghor ?