Khliehriat, Risaw, 16: Ka jingpynsngew paidbah jong ka Green Valliey Industries Limited (GVIL) ba la pynlong da ka Meghalaya State Pullution Control Board (MSPCB) ha ka sngi Palei ha shnong Lumshnong ka la ïaid beit namar ka jingai jingkyrshan jong ki paidbah.
Ka jingpynlong ia kane ka jingpynsngew paidbah ka dei halor ka jingthmu jong ka GVIL ban khlong ïa u mawshun na ka par mawshun kaba don ha Lumshnong ba la tip ruh kum ka Surve Larung Lumshnong Limestone Mining Project kaba heh 44.58 hectare kaba thmu ban pynmih 6,54,577 lak ton u mawshun ha ka shi snem.
Ha ka jingpynsngew paidbah ki la don khat ar ngut kiba la ai jingkren ha rynsan ha kaba shiphew ngut ki la ai ka jingkyrshan ba pura ïa ka kompeni bad ar pat ki dei kiba pyrshah ki kynthup u Bah Hardy Lamare na ka shnong Lumshnong bad ka Khasi Students Union East Jaiñtia Hills District ba la ai jingkren da u General Secretary u Bah K.S.Suchiang.
U Waheh Shnong ka shnong Lumshnong Bah Monlang Ladong uba la ai ka jingkyrshan ïa ka project tih mawshun, u la pynshai da kaba ong, “kum ka jingpynshai ka shnong Lumshnong naduh u snem 2009 lyngba ka jingiatip lang ka Dorbar Shnong ngi la ai ïa ka No Objection Certificate (NoC) ïa ka Green Valley Industries Limited na ka bynta ban tih ïa u mawshun bad ha ryngkat ka NoC ngi la ïasoi bad iateh ïa ki soskular kiba long ka jingmyntoi na ka bynta ki paidbah nongshong shnong. Kumta halor kane ka nongrim ngi kum ki nongshong shnong haduh kine ki sngi ngi sngewtynnad ïa ka Green Valliey Industries Limited ha kaba ïadei bad ka jingïaid lynti na ka bynta kane ka projek tih maw shun. Kumta ha ryngkat ka jingkyrshan jong ki paidbah nongshong shnong nga ai ka jingkyrshan ïa ka Green Valliey Industries Limited ha kaba iadei bad kane ka projek tih maw shun.”
U General Secretary ka KSU East Jaiñtia Hills District Bah K.S Suchiang uba la ieng ban pyrshah ïa ka jingthmu ban khlong mawshun jong ka Green Valliey Industries Limited, u la ong, “da ka mynsiem ka jingsngewkhia na ka bynta ka mariang ngim don kano kano ka jingmut kaba shalyndet hynrei ngin kren beit ha kaba ïadei bad ka mariang. Ka KSU ka ieng haduh kane ka khyllipmat ka dei namarba ngi la dep ïohi ba ki kompeni kim shym la bud satia ïa ki kyndon aiñ ïada mariang, kane ka la paw shai bad phi sakhi ïa kata halor kaei kaba la jia bad katno tylli ki kompeni kiba don hapoh ka Elaka jong ngi ki khlem bud satia ïa ki kyndon aiñ ïada mariang.”
“Haoid, ki ai kam ai jam, ki wanrah ïa ka roi ka par hapoh ka Elaka jong ngi hynrei haba ngi phai pat sha ka mariang katno ngi iam kthang, kaei ka ban jia ïa ka lawei ki khun ki kti ki jong ngi, ïa mynta ngi im pahuh, ka spah kaba ngi ïoh mynta ngi dang lah ban nñew ïa ka, hynrei kane ka khyndew ka shyiap pat ka dei ka kamram jong ngi ba ngin tyngkai ïa ka, lada ki kompeni baroh ki la khlong lut ïa u mawshun ki bud thik thik ïa ki kyndon aiñ ïada mariang ha kaba ngi nyngkong ngi pdiang, hynrei ngi ïohi ba mynta pat ki kompeni kim shym leh kumta, ki pynjot ïa ka mariang bad ki ieh shrah kumto. Hato dang lah neem ban pynim pat ïa ka mariang bad da kaba suk kin lah beit lada ki shim ïa ka jingkitkhlieh ban pynim biang ïa ka mariang hynrei kim leh kumta, hynrei ki la shu siew da ka kuna sha ka Sorkar bad ka Sorkar ka la map. Kumta halor kane ka nongrim ba ka KSU ka ieng pyrshah.”
U Environmental Engineer ka MSPCB u Bah Y.F. Laloo, u la ong ba Board ka dei tang ka shnat treikam kaba don ïa ka bor tang ban khot pynlong ïa ka public hearing ha kaba na ka liang ka ophis ka la ring video ïa ka baroh ki jingkren kiba iadei bad ka mariang bad ïa ka video yn sa phah pat kum ka kaiphod sha ka sha ka Ministry of Forest, Environmental and Climate Change, New Delhi bad dei ka MoEF ka ban sa rai ban ai ia ka Environmental Clearance.
Kiba la ai jingkyrshan ïa ka public hearing ki kynthup ruh u Dolloi ka Elaka Narpuh Bah Manbha Kyndoh, u dkhot ka shnong Lumshnong Bah Grimlang Dkhar, u Bah Minot Sympli na ka shnong Chiehruphi, Bah Damekit Pynkhlong na ka shnong Lumshnong,u Bah Biangmon Phniaw bad kiwei kiwei.
