Ba jia khah khah ki jingshah thombor lum u CM ïa ki nongïalam shnong

Shillong, Risaw 16 : Ka sorkar jylla mynta ka la ïaid shaid shaid ban pyndait noh da ki kor ring dur lane ki CCTV ha ki 47 tylli ki shnong kiba don ha nongbah Shillong ban pynsuk ïa ki pulit ban thwet bad ïoh kem ïa ki runar kiba donkti ha ki kam runar bad ki kam sniew ba harukom khamtam eh ha ka jingthombor ïa ki longkmie bad ki khunlung khynnah ha ka jylla.
Ïa kane ka rai ka sorkar jylla ka la shim ha ka jingïalang phylliew jingmut kaba la lum da u Myntri Rangbah ka Jylla ha kane ka sngi Palei bad ki nongïalam shnong, ki nongïalam niam, ki kynhun trei mon sngewbha ryngkat ki ophisar, ki heh pulit bad kiwei kiwei. Ha kane ka jingïalang la ïatai sani ruh ïa ki lad ki lynti kumno ban pynkhlain shuh shuh ïa ka jingtreikam jong baroh lang khnang ba yn lah ban tehlakam ïa ki kam sniew kiba harukom kiba ktah ïa ka imlang sahlang.
Haba kren bad ki lad pathai khubor, u Myntri Rangbah u la ïathuh ba ki la don haduh 47 tylli ki shnong kiba la jied ha nongbah Shillong ban pyndait noh da ki CCTV bad na kine haduh 7 tylli ki shnong la dep ban pyndait.
“Ïa kiwei ki 40 tylli kiba dang sah pat yn sdang noh bad la buh thong ban pyndep noh ïa ki hapoh ki 60 sngi lane la kumno ha u Naiwieng ne Nohprah ynta u snem,” ong u Myntri Rangbah.
Katkum ka jingïathuh jong u, kane ka jingpyndait CCTV ha ki shnong ki thaw kan dei ha ki ar bynta ha kaba ïa ka bynta kaba nyngkong ka long ban pynndait shwa ïa ki CCTV Camera ha ki shnong bapher bapher nalor ka jingbuh ïa ki command centre kaban peit bad pynïaid da ki Rangbah Shnong bad ka Dorbar.
Shuh shuh la ïathuh ruhba kawei kawei ka shnong kan ïoh ban buh haduh lai haduh san jaka ki CCTV.
Nangta u la ong pat ba ïa ka bynta kaba ar, ïa kine ki CCTV yn sa pynïasoh pat bad ka Integrated Command and Control Centre (ICCC) kaba don ha New Shillong.
U ong ruh ba ha kaba sdang mynta, kin leh shwa ha nongbah Shillong, Tura bad Jowai bad hadien kane pat kin sa leh sa ha ki district head quarter bad ter tere ha ki sub division ter ter sha kiwei ki shnong ruh kumjuh.
Shuh shuh u ong katba nang ïaid ka kam kin peit thuh ruh khamtam hadien ba ki la dep ban ïa syllok bad ki skul kumjuh ki snong bad kumta ha kino ki jaka ba ki sngewdei ban buh ïa ki CCTV kin sa leh ïa kaba donkam namar kane kan long ban pyntikna ïa ka jingshngai jong ki paidbah.
Shwa kane u Myntri Rangbah u la ong ruh ba watla ki sakhi ba ka jingjia thombor ka la kham hiar mynta hynrei ka jingmih kynsan ki jingjia kiba khah khah ha kine ki khyndiat taiew bad bnai ka la pynlong ïa ka sorkar ban sngewkhia bha.