Sah khongreng ka ïing skul ha Hingaria naduh ba syllad ka eriong Sitrang, bynñiaw u WS

0

Khliehriat, K’ Lyngkot 23: Ka ïing skul LP kba don ha shnong khappud ha Hingaria, East Jaiñtia Hills District ka dei ka skul kaba la shah pynjulor ha ka er ïong Sitrang kaba la jia naduh ka 24 tarik u Risaw 2022 ha kaba ki tin ba sop ïa ka ïing skul ki la shah lied bad shah kit lut baroh ha ka jingbeh kyrthep ka er ïong bad kane ka skul ka la shah ktah haduh katta katta ha katei ka er ïong.
Halor kane, u Waheh Shnong Hingaria, u Bah Thepmon Khonglah, u la pynpaw ka jingsngew khia kaba jur namar ka jingbym shim khia ka sorkar ban maramot ïa katei ka ïing skul kaba la buh jingeh ïa ki khynnah skul bad ki nonghikai khamtam ha ka por slap.
U la ïathuh ruh ba katei ka ïing skul, ka dei ruh ka Polling Station kaba ki nongshong shnong ki ju thep vote ha ka por election bad ong ba lada ki bor sorkar kim shim khia kham kloi ban phah ki lad jingïarap kan buh jingeh ban pyllong ïa ka jingïathep vote ki paitbah ha kane ka election.
La ong ruh ba naduh ba shah pynjulor ïa ka ïing skul, ki nonghikai ki la shu pynlong skul ha ka ïing shnong kaba rit ha kaba baroh ki khynnah skul ki hap ban shu ïa shong khapngiah.“Kum u waheh shnong nga kwah ban pynkynmaw batang shu jia kine ki jing shah pynjulor, mar mar nga lah leit mih sha ka ophis jong u Deputy commissioner East Jaiñtia Hills District ha Khliehriat ban pyntip bad nga la dep buh ruh da ka jingthoh bad kyrpad ïa u Deputy Commissioner ba lada long kaba lah ban ïaleh shitom ban pynïoh kham kloi ïa ki lad jingïarap bad maramot ïa ka ïing skul, namar ka ïing skul ka long kaba donkam haduh katta katta, ban dup ïoh ban pyllong skul biang ïa ki khynnah hapoh kane ka iingskul namar mynta ka la jan dei biang ka por ban long skul ki khynnah” u la ïathuh ruh ba na ka liang ka ophis jong ka SDEO East Jaiñtia Hills District ka la dep ban phah jurip ïa katei ka ïing skul, hynrei kaba pynlyngngoh ïa u Waheh Shnong pat ka long ba ka tnat pule puthi bad ki bor ba dei peit pat kat haduh mynta kim pat lah ban phah kano kano ka jingïarap ban ïoh ban maramot ïa ka ïing skul.
Kumta na ka liang u Waheh Shnong, u buh ka jingkyrpad ïa ki bor sorkar bad ka tnat pule puthi ba kan phah noh kham kloi ïa ki lad jingïarap khnang ba kan nym buh jingeh ïa ki khynnah skul, ïa ki nonghikai bad kumjuh ruh ïa ki paidbah nongshong shnong ki ba thep vote.
Katkum ka shithi ba la phah sha u Deputy Commissioner ka East Jaiñtia Hills District myn ha ka 27 tarik u risaw 2022 ba la soi kyrteng da u Waheh Shnong Hingaria, u bah Thepmon Khonglah, u la pyntip ïa ka jingshah pynjulor ka ïing skul ha ka jingwan beh kyrthep ka er ïong Sitrang bad ong ba ka ïing skul kam don shuh ki tin ba tap bad kyrpad ban pynïoh noh kloi ïa ki lad jingïarap, la ong ruh ba namar ba ïa ka ïing skul la shna da ka dieng bad tap da ka tin, kumta haba jia kano kano ka jingwan lynshop ka mariang kane ka skul ka ju shah ktah man ka por, kumta ka bor synshar shnong ka kyrpad ïa ka bor district ba kan sngewbha ban pynïoh noh da kawei ka ïing skul kaba paka kaba da ka dewbilat khnang ba kan nyn wanrah jingeh ka ban long ruh na ka bynta ka jingïaid beit ka skul bad ba ki khynnah ruh kin lait na kano kano ka jingma.
La pynpaw ruh da kaba ong ba, ka lawei jong ki khynnah skul kan sa shah ktah lada ïa kane ka skul ym maramot noh kham kloi namar ki bor pynïaid skul (School Management) kim lah ban pynmih pisa ban maramot bad ban shna ïa kane ka ïing skul, kumta ka shnong ka khmih lynti bad kyrpad na ki bor district ba kin sngewbha ban ïarap lem na ka bynta ka jingbha bad jingmyntoi ki khynnah.

Leave A Reply

Your email address will not be published.