ïa ka kam synshar khadar la pynkhamti da U Blei wat kheiñ khiewjakai : Ardent

Pynursla, K’lyngkot 23: U President ka Voice of the People Party (VPP) u Bah Ardent M Basaiawmoit ha ka sngi Nyngkong ha ka jingïalang ka VPP ha ïew Pynursla u la ong ba ka kam synshar khadar ka dei kaba la buh beit buh ryntih da u Blei bad kane ka kam synshar khadar ka long kaba kyntang bad kaba ym dei ban satia ban kheiñ kum ka kam kai ne ka kam tamasa.
“Kynmaw ha u Khasi ban jied nongsynshar ki da nguh da dem bad bunsien u syiem bad u nongsynshar ki long ruh ki sohblei ne nongbat niam jong ka Hima bad kane ka pyni ba ha u Khasi ruh u kheiñ ba ki nongsynshar ki dei ki atiar kiba U Blei u jied ban sharai ïa u paid bynriew,” u la ong.
U la bynrap, “Lada phi peit ha ka Baibyl ruh la kdew shai ïa ka kamram bad ki deiti kiba u nongsynshar u dei ban pyndep namar ka long ka kam kaba khia bad kaba kyntang. Hynrei mynta kane ka kam kaba lada ngi peit na ka jinghikai tynrai ka jaidbynriew ne ka niam Khristan ruh la kheiñ kum ka kam tamsa. Ngi jied ïa ki nongsynshar da kaba leit die wat ïa ka vote, ngi jied nongsynshar da kaba pynhsong nongrim ha ka bai dawa ba ai u MLA shisien san snem, ka bai kot shisien san snem bad ki jingdonkam kiba ngi pan tang shisien san snem bad kane ka dei ka jingkheiñ kai ïa ka kam ba kyntang bad ka jingpynpoh dor ïa ka kyrdan longbriew.”
U Bah Ardent u la ong ruh ba ha ka history ka jylla ym pat ju don uwei ruh u Myntri Rangbah ne ka sorkar kaban nud ban ong ba ka Block 1 bad Block 2 ka dei ka jong ka jylla Assam “hynrei dei tang u Symbud Myntri Rangbah uba mynta ka jylla uba la ong beit ba ka Block 1 bad 2 ki la dei jong ka Assam bad kane ka shong ha phi ban rai bad pyrkhat,” u la ong.
“Ka ju don ka jingong ba mat leh sniew u nongïalam ha ka jylla katno katno hynrei u leh bha ïa ka thaiñ ba u mih khmat namar kynmaw bha ba lada ngam ka jylla, ka Pynursla ruh kan ngam lang, lada shyrkhei ka bamsap ha ka jylla ka Pynursla ruh kan shah ktah lang,” u la ong.
U Bah Manbhalang Thabah u kyrtong ka VPP na Pynursla haba ai jingkren ha kane ka sngi u la ong ba kat kata ka Pynurlsa kaba la bna kum ka pdeng duh jong ka thaiñ Riwar hynrei kawei ka skul sorkar kaba don haduh ka klas kaba 10 kam don satia.
“Kren kop phi katba kren kop ba u MLA ka thaiñ u la leh bha hynrei kynmaw ba tang kawei ka skul sorkar haduh ka klas 10 kam don ha baroh kawei ka dong ka thaiñ Pynursla bad lada ym dei ba ngi shah leh isynei ha ki balang bad seng niam ka sorkar bad ki nongïalam jong ngi lei kim pyrwa ban skul ne jaka pule ha ka thaiñ,” u la ong.
U la ong ruh ba ka jingdon ka Pynursla CHC kam lah satia ban ai jingsumar kaba paka kumba ka dei ban ai namar wat tang ka test kaba rit rh kum ka X-ray ruh kam don bad ong ba lada ki paidbah ki shitom ki jingshitom barit eh ruh kin hap beh beit sha Shillong bad ong ruh ba wat ki dawai ruh bunsien la shu hap ban thied beit namar ym don dawai satia na CHC.
Ha kane ka sngi la ïoh ruh ka jingkren na u kyrtong ka VPP na Nongthymmai u Bah Winston Tony Lyngdoh.