Shillong, Kyllalyngkot 23 : ïa ka Meghalaya Regulation of Gaming Act 2021 la pyndam noh ha ka jylla Meghalaya bad ïa kane la pynbna da ka jingpynbna ba la pynmih hadien ba la dep soi u Lat ka jylla.
Kat kum ka jingpynbna la pynpaw ba ïa ka Meghalaya Regulation of Gaming (Repeal) Ordinance 2022 la pyndam bad pynbna da u Lat ha ka 31 tarik Nohprah bad la pynmih ruh ïaka jingpynbna ha ka Extra Ordinary Gazette jongka Meghalaya ha ka 3 tarik Kyllalyngkot 2023.
“ ïa ka Meghalaya Regulation of Gaming ACt 2021 (Meghalaya Act 9 of 2021) ïa kaba la pynkylla noh kum ka Repealed Act la pyndam ne pynduh noh” ong ka jingpynbna. Kumta kane ka aiñ kan ym treikam ei ei shuh ha kane ka jylla bad kam dei ban ktah ruh ïa kiwei kiwei ki aiñ.
La pynpaw ba ka ïing dorbar thawaiñ ka jylla ka la mynjur ïa kane ka Meghalaya Regulation of Gaming Act 2021 da ka jingthmu ban pynïaid beit pynïaid ryntih ïa kino kino ki kam ïakhalai ha ka jylla kynthup ruh ïa ka online khnang ba kan wanrah ka jingïoh nong ïaka jylla na ka khajna bad kan ïarap ai kam ai jam ruh ïaki samla.
Hynrei hadien ba la mih ka jingpyrshah jur na baroh ki liang halor kane ka aiñ kumta ka sorkar ruh da ka jingsngewkhia ka la rai ban pyndam noh ïa kane ka aiñ namar ka burom ïa ka jingsngew jong ki paidbah ong ka jingpynbna.
Namar ba ym shym la shong dorbar shuh bad kumta namar ka jingdonkam ban pynmih ka jingpynbna u Lat u la sngewdei ban leh ïa kaba donkam kat kum ka bor ba la pynkup ha u ban rai halor kane ka jingrai ka kynhun myntri ban pyndam noh ïa kane ka aiñ.
