Pynursla, K’lyngkot 23: Ka jingnoh mynsiem ki paidbah ban synñiang pisa sha ka Voice of the People Party (VPP) bad sha ki kyrtong ka la phriang sha kylleng ki jaka bad ïa kane la lah ban sakhi wat ha Pynursla ruh ha kaba ki paidbah kiba la wan ban sngap ïa ka jingpynshai u kyrtong ka party u Bah Manbhalang Thabah bad kumjuh ki nongïalam ka party ba kynthup ïa u Bah Ardent bad u Bah Winston Tony Lyngdoh, ha kaba tang shu wai ka jingïalang ki la tur sha khmat ban ai jingmut ba dei ban lum synñiang na ki ruh ban ïarap bei pisa na bynta u kyrtong ka VPP.
Haba pyrshang ban kylli ïa ki katto katne kiba la noh synñiang ïa ka jingnoh mynsiew jong ki ban sei pisa na pla ki la ïathuh ba kim kwah shuh ban shah thied ha ki kyrtong na bynta ba kin long MLA hynrei kin sei pisa hi na pla lajong ban sei MLA.
“Baroh shi katto ngi ju shah thied ha ki kyrtong bad ynda ki la jop pat ki leh sat ïa ngi ki paidbah bad mynta ka kynti te ngin sei na pla lajong wat la tang shiphew tyngka ruh ban pynjop MLA uba ngin synñiang ha la ka bor ïa ka jinglut jingsep jong u,” ki la pynpaw.
“Ngi dei ban sngewthuh ba ki kyrtong kiba ïakhun elekshon ki donkam hi ka pisa ka bai leit bai wan, ka bai tynghuk bad kor pynsawa wat ka bai print kot ruh dei ba ngi kwah tynrong ïa kum kane ka jinglut ba ngi pynmih pisa ym da ka jingthmu ba une u kyrtong ruh un leit thied vote da ka pisa ba ngi synñiang,” ong ki katto katne ki nongshong iew kiba wan ban synñiang sha ka jingïalang ka VPP.
