Shillong, K’Lyngkot 23 : Ki nongtrei jong ka Khasi Hills Autonomous District Council ha ka step sngi Nyngkong ki la pynlong da ka jingsangeh treikam halor ka jingslem jong ka Council ban pyllait noh ïa ka ‘Arrear’ kaba dei ka hok jong ki.
Halor kane, na ka liang u Chief Executive Member ka Khasi Hills Autonomous District Council (KHADC), Bah Titos W Chyne u la ong ba ka jingbym pat ïoh ban siew ïa ka ‘Arrear’ sha ki nongtrei ka Council ka dei namar ba ka Sorkar Jylla kam pat pyllait ïa ka bhah pisa kaba dei jong u 2022-2023 sha ka Council.
Shwa kane, u CEM u la kynduh ruh ïa ki nongtrei jong ka Council kiba la pynlong ïa katei ka jingsangeh treikam ha katei ka sngi.
Na ka liang u CEM haba kren bad ki lad pathai khubor u la ong ba kadei ka hok jong ki ban ïakhih hynrei u la ong pat ba ki la dei ban pyntip shwa khnang ba kum ka Council kan ïoh pyrkhat. “Ngim shym la shong kli kti, bad ka Arrear ka don ruh kaba sahkut jong ki MDC barim bad kiba mynta namar ka jingbym don pisa”, u la ong.
U la ong ba ka jingbym pat ïoh ïa ka bhah pisa ka buh jingeh bha ïa ka Council kaba hap ban pynbeit na ka bynta ka tulop bad ka Arrear kumjuh. Da kaba kyntu ïa ki nongtrei ban ïai shah, u la ong, “Ïa ka tulop hi ngi pynbiang na uwei sha u wei u bnai”.
Da kaba pynpaw ba ka jingïatreilang ka long kaba donkam, u la ong, “Watla ka dei ka bynta jong ka tnad pla tyngka ban ïakren ïa kane hynrei ngi hap ban shim lang ka jingkitkhlieh bad ym lah ban ñiat uwei ïa u wei kumba paw ha ka Sorkar Jylla”. Shuh shuh u la pyntip ruh ba kum u CEM u la shim ïa ka rai ban pyllait noh 50 persen ka Arrear jong ki bad la dep bthah ruh ïa ki ophisar ban pyntyllun ïa ka kam sha khmat.
Haba pynshai halor ka jingthung kam casual bun ngut, u CEM u la ong ba ka Council kam banse ban thung briew kyrkieh kumba lai ne saw ngut ha ka tnad Building By- laws bad kumjuh ha ka tnad Land namar ka jingdawa ka kam.
