Hadien ba la phet lut ki MLA, khring ka Congress da u MLA ka NCP na rilum Garo

0

Shillong, K’Lyngkot 23 : Ka Congress hynne ka sngi Nyngkong ka la pdiang burom ïa u MLA jong ka NCP na Gambegre, u Saleng A Sangma hadien ba u la dep ban resaiñ noh kum u nongmihkhmat na katei ka thaiñ.
Katei ka jingleit pynïasoh Congress jong utei u Saleng, u ba la jop haduh lai sien na katei ka constituency ka dei hadien ba baroh ki MLA jong ka Congress ki la phet sha ki party bapher bapher kynthup sha ka Trinamool Congress, UDP, NPP bad ruh sha ka BJP.
Ha kane kajuh ka sngi, ka Congress ka la pdiang burom ruh ïa u MDC ba la jop haduh saw sien na Sutnga – Nongkhlieh Ma Richard Lyngdoh uba la wan ban pynïasoh lang sha ka party ha shwa ka elekshon MLA. Ïa kitei baroh arngut la pdiang burom da u President ka party, Bah Vincent H Pala ryngkat ka jingdonlang u Media Coordinator ka AICC u Mathew Anthony nalor kiwei kiwei ki heh ka party.
Lah ruh ban kdew hangne, ba u Bah Richard u pynkhreh ban aireng mynta ka kynti na Raliang constituency kaba la mihkhmat da u MLA ka NPP, Bah Comingone Ymbon.
Na ka liang u President ka party haba kren ha ka jingïalang, u la ong ba ka lyer jong ka Congress ka la beh jur bha mynta bad kane kan sdang na rilum Jaintia bad ter ter sha rilum Garo da ka jingwan pynïasoh jong kitei ki arngut ki nongïalam ba rangbah.
U la pynbna ruh ba ka party la kumno kumno kan pynbna noh ïa ka kyrteng jong baroh ki krytong ha ka 25 lane ka 26tarik mynta u bnai. “Tad haduh mynta ki la don 57 ngut ki kyrtong na ki 60 ngut,” ula ïathuh da kaba bynrap ruh ba mar ïa pynbna ïa ka kyrteng jong ki kyrtong, ka lyer jong ka jingkylla kan sa beh ha ki nongthep vote ba ka Congress ka dang don.
Nalorkata u Bah Pala u la pynkynmaw ruh ba kumno u Saleng u la shah pynduh tiket ha ki nongïalam barim. “U la don bad ki samla Congress bad u la leit ruh sha UP na ka bynta ka elekshon jong u Rahul Gandhi, u la trei shitom ha kito ki por hynrei ki don pat kiba ïohi ba u dei ka jingma ïa ki kumta ki la pynduh tiket ïa u,” ong u President.

Leave A Reply

Your email address will not be published.