Shillong, K’lyngkot 23: Ka Seng National People’s Party (NPP) ka la sdang ïa ka jingïalap elekshon MLA mynta ka snem na ka shnong kaba u Purno Sangma u ju ieit eh bad kata kadei ka Shnong Adokgre, kaba hap ha Kharkutta Constituency ha North Garo Hills District.
Ka Adokgre kadei ka Shnong kaba u(L) Purno Sangma,borabor u ju sdang ïa ka jingïalap elekshon, naduh ki por kiba u la rung sha ka ka saiñpyrthei ha ki snem kiba la leit, bad kadei ka kyrteng kaba la ai da ma u, kaba mut ka Shnong ka jingjop.
Ha kane ka jingïalang la ïohi ba da ki hajar hajar ngut ki paidbah na kylleng ki jaka jong ka Rilum Garo, ki la ïatuid sha katei ka lympung da kaba rah bad kaweh ïa ki lama jong ka NPP ha ryngkat ka shad ka kmen haba la pyntem ïa ki jingrwai jong ka Seng.
Ha kane ka jingïalang, ki nongïalam jong ka Seng na Rilum Khasi Jaiñtia ki la hiar lang sha katei ka Shnong kaba long ruh kum ka dak ka jingïapyni ïa ka jingbun paid nongkyrshan, khyndiat sngi hadien ba la wan hiar ka Mamata Banerjee, ka nongïalam ba ha khlieh duh jong ka Seng Trinamool Congress kaba la wan sha Garo Hills ha kane ka taïew baladep.
Ïa ka jingïalang la pynlong ha Chenagre Stadium, kaba dang shu dep plie dang shen bad kadei ka Stadium kaba u Purno Sangma, u la angnud ban shna naduh ka por ba u dang long u Nongmihkhmat.
U Bah Prestone Tynsong, uba long u National Vice President ka Party haba kren ha ka jingïalang, u la ong ba u la rung sha ka Seng NPP na ka Congress ha u snem 2018 dei namar ka daw jong u Purno Sangma. Da kaba kdew sha ka dur jong u Purno kaba la don ha ka flex kaba heh bha hadien jong u, u Bah Prestone u la ong “Nga la rung sha ka NPP dei namar ka daw jong u”.
U la ong ba dei namar kane ka daw ba kum ka Party kin ïai bud ïa ki dienjat jong une u Nongïalam ba khraw jong ka jylla. U la wer ïa ki paidbah Garo Hills ba kin ïai bteng ka jingkyrshan ïa ka NPP hapoh ka jingïalam u khun jong u (Purno) khnang ban ïoh pyntreikam ïa ki jingangnud jong u nongseng ka Party.
U Conrad Sangma, haba kren ha kane ka jingïalang u la pynkynmaw ïa ki kam ba u Purno Sangma, u la leh na ka bynta ka Garo Hills bad ka jylla hi baroh kawei bad ka NPP kan ïai trei halor ki nongrim ba une u nongïalan ba la khlad noh u la trei.
