Sa tang lai sngi mynta la poi ka sngi thep vote jong kane ka election MDC mynta u snem,namar ka jingïathep vote kan long ha ka 21 tarik mynta u Rymphang 2025, hynrei lada bishar bniah la lap ba ka lyer election ka kynjah bha ha ki jaka sor hynrei ka shongshit bha pat sha ki thaiñ nongkyndong. Kane ka pynpaw ba ki paidbah ha sor ki la stad kim kwah shuh ban pynpaw shano ki kyrshan hynrei ki da bishar bniah shwa ban shim rai.
Ki katto katne ki riew rangbah naduh ki shynrang bad ki longkmie, ki pynpaw “ Imat ki paidbah ki la stad mynta hangne ha sor namar kim ïaleh shongshit khleh biej shuh kumba long ha ki election kiba la dep. Mynta te ka da kynjah kane ka lyer hangne ha sor bad ngi ïohi ba ka jingshongshit election ki briew ka dei tang sha ki thaiñ nongkyndong. Ha nongkyndong ki paidbah ki da pynpaw beit shano ki kyrshan la ka dei na ka NPP, VPP, Congress, HSPDP, UDP, Independent, KHNAM ne BJP ruh ki mih madan beit ym kum hangne ha sor ba ki paidbah kim treh ïamih madan shuh lait noh kito kiba la ïabud beit hakti ha kjat jong ki kyrtong jongki”.
Tang kawei kaba itynnad ba kat haduh mynta ym don kino kino ki jingjia jong ki jingïashoh ïadat ha ki thaiñ nongkyndong ki ïaleh shongshit bad ïashad beit ha la ka jong ka jong ka party ne kyrtong ba ki kyrshan. Katba ha ki por ba mynshwa naduh ki por ba ïa kanbas la ïashoh ïadat bad ïa byrngem byrsit ha ki thaiñ nongkyndong bad ka jur eh sha Jaintia Hills bad West Khasi Hills. Mynta sha ki thaiñ nongkyndong ruh la bun kiba nang ba stad na kata ka daw ki la ïa sngewthuh ïa kata ka jingmut synshar paidbah namar ha ka synshar paidbah ki lah ban jied ne kyrshan ïa kino kino ki party ne kyrtong ba ki mon ym don jingkhang.
Kum ban shu pynkynmaw ha ka election jied MDC sha ka ïing dorbar thawaiñ Khasi Hills Autonomous District Council (KHADC) ki don 158 ngut ki kyrtong kiba ïa ai reng, na kitei 146 ngut ki dei ki shynrang bad 12 ngut ki dei ki kynthei. Sha ka election jied MDC sha ka ïing dorbar thawaiñ Jaintia Hills Autonomous District Council (JHADC) ki don 272 ngut ki kyrtong, kata 253 ngut ki shynrang bad 19 ngut ki kynthei.
Related Posts
Ki nongthep vote pat na ka bynta ka KHADC ki long 9,96,518. Na kine 4,81,268 ki dei ki shynrang bad 5,15, 247 ki dei ki kynthei bad 3 ngut kita ki Third Gender.
Ha JHADC pat ki nongthep vote ki don baroh ki 3,12,300. Na kine ki shynrang ki don 1,51,079, ki kynthei pat 1,61,220 bad Third Gender 1.
Lada kheiñ lang baroh ki nongthep vote ha KHADC bad JHADC ki long 13,08,818 ngut. Ki shynrang ha baroh ar ki ADC ki long 6,32,347 ngut bad ki kynthei 6,76,467 ngut bad ki Third Gender pat 4 ngut.
Kaei kaba pynkyndit mynta ka sngi ka long ba ka VPP ka dawa ban pynkhlaiñ bor pahara ha kito ki polling station kiba kham don jingma katba kiwei kiwei ki party ki sngap beit jar jar namar ki la shaniah ha ka jingpynïaid ki bor synshar district ban peit ïa ka shongsuk shongsaiñ. Hato kane ka jingdawa ka VPP kam paw ba kane ka party mynta ka la tieng thot thot ïoh liem lyndang ki kyrtong jongka namar ym lah ban len mynta ka kynti ym dei shuh kum kato ka lyer election MP ne MLA hynrei ka la thynda bha namar ki paidbah ki la sdang ïohi ba tang kawei ka kam ruh ym pat urlong naduh ba ki la jop kum ki MLA bad mynta ki dang ap sa ïa u MP kaei kaba un leh. Hooid u la sdang ban kren hapoh ka ïing dorbar hynrei kam kut tang katta ki paidbah ki kwah ruh ban ïohi ïa ki kam kiba un trei kum u MP.
Mynta ki paidbah ki dang ïoh por ban shong bishar sa lai sngi shwa ba kin ai ïa ka rai kaba khatduh ïano kin jied ban long kum u nongmihkhmat jongki ne ïa kano ka seng saiñ pyrthei kin pynjop bun eh ban ïoh ïalam ïa ka jingsynshar ha KHADC bad JHADC