Sa ha rilum Jaiñtia pur ka ishu ‘Reservation Policy’, rai ka JCCRP ban shong kyllain myngor
Jowai, Jymmang 24: Ka Jaiñtia Coordination Committee for Reservation Policy (JCCRP) kaba kynthup ïa ki seng bhalang ka Jaiñtia Student Union (JSU), Jaiñtia Youth Federation (JYF), Jaiñtia Student Movement (JSM), East Jaiñtia National Council (EJNC), ka Synjuk Waheh Chnong Jowai bad ka Synjuk Waheh Chnong Ri Jaiñtia mynta ka sngi kila shim ïa ka rai ban mih sha madan ban dawa na ka sorkar ban pynbha noh ïa ka Reservation Policy bad ka Roster System.
Na ka liang u Chairman samla Jersom Shylla ha ka jingkren sha ki lad pathai khubor ula ong ba kane ka Committee kala dep ban phah jingthoh shaduh u Deputy Chief Minister ka jylla u ma Sniawbhalang Dhar, wat na ka liang u Myntri Rangbah ka jylla ula dep ban khot ïa ka jingïalang jong ka All Party Meeting bad ki don ki Party ki bym shem la pdiang ïa kane ka jingpyntreikam ïa ka Roster System kaba la long ha ka 19 tarik mynta u bnai.
“Lada ka sorkar kam lah ban pynbha noh ïa kane ka Reservation Policy hapoh ka jylla kan bun ka jingma ïa ki samla Khasi, Jaiñtia ha ka rukom thung kam thung jam kaba la noh shilliang sha ka paid Garo lyngba ka Roster System”. “Lada ka long katba long ka sorkar jylla ka dei ban pynbha noh ïa kane ka Reservation Policy kumba long sha kiwei ki jylla katkum ka jingbun briew”, la ong u samla Jersom.
Ha kaba ïadei bad kane ka jingdawa na ka liang ka Committee kala rai ba ha ka 29 tarik kan don ka jingïashong kyllaiñ myngngor (Sit In Demonstration) ha Jowai, 31 tarik ha Khliehriat bad ha ka 2 tarik ha Amlarem Sub-Division bad ka por ka sdang naduh ka 10 baje mynstep haduh 5 baje janmiet.
La kyntu ïa baroh ki nongshong shnong kumjuh ïa ka samla pulat ka Ri-Lum Jaiñtia ba kin ïasnohkti lang bad kane ka jingpynbeit khnang ban kane ka jingdawa pynbha noh ïa ka Reservation Policy hapoh ka jylla kan long kaba jop.
Shuh shuh ula ong ba kane ka long tang ka sein jam kaba nyngkong lada ka sorkar kam lah ban shim khia ïa kane kim banse ban shim da kiwei pat ki lynti kiba kham tyngeh namar kane ka long ka ïap ka im jong ka lawei ki khun samla.