Lada ym kren ki MLA Khasi mano ban kren na bynta jong ngi ki, buh jingkylli u samla

Shillong, Jymmang 24: U Samla Gerald A Kurbah u samla pule jong ka Shillong College uba la wan ban kyrshan ïa ka jingïakhih u shong shah thngan u Bah Ardent ban dawa na ka sorkar jylla ban dawa ban pynkylla ïa ka Reservation Policy , u la buh jingkylli ïa ki MLA Khasi kibym shym la kren eiei halor ka jingdonkam ban pynkylla thymmai noh ïa ka reservation Policy kat kum ka jingdawa ka por ban ai bhah sha kano kano ka kynhun jaidbynriew kat kum ka jingdon paid.
“Nga kwah ban buh jingkylli ïa ki MLA Khasi kiba sngap mynti ha kaba ïadei bad kane ka mat ba lada phim kren ma phi na bynta jong ngi ki samla phi pyrkhat mano pat ban kren bad da kynmaw ba u paidbah u la pynkhamti ïa phi ïa kane ka iktiar bad phi hapban pyndep hok,” ong u ong u Samla Gerald haba ïakren bad u Mawphor.
“Phi ki 31 ngut ki MLA na ka jaidbynriew lada phim nud ban kren ïa kane kan bha ba phin hiar noh na ka shuki MLA ai ba kiba nud ban kren kin shim ia kane ka jaka,” u la bynrap.
Shuh shuh une u samla u la maham ba ka sorkar kam dei ban shim sting ia ka jingiakhih kaba u Bah Ardent u la sdang namar kam dei kaba u iakhih tang na bynta ka jingmyntoi shimet jong u hynrei jong ki samla ka jaidbynriew bad ka pateng ban dang wan. U la ong ruh ba lada kaei kaei kaba sniew ka wan jia ha kane ka jingïakhih u Bah Ardent ka sorkar ka dei ban shim jingkit khlieh namar dei ma ka ba kuman ban sngap ïa ka jingdawa ka VPP.
“Ngam kwah shuh ban ai ka jingkyntu hynrei nga shu kwah ban maham ba lada kaei kaei kab sniew ka jia ïa u Bah Ardent ha kane ka jingshah thngan jong u ka sorkar ka dei ban shim jingkit khlieh namar lada ka jia ka dei na ka daw ka jingkuman ka sorkar,” ong u Samla Gerald.
“Nga kwah ruh ban ong ïa ka sorkar ba lada ka ïai kumman kumne kaba nga i sheptieng ka dei ïoh ba kin don ki khun samla kiban shim da ka lynti kaba eh ban bat suloi na ka jingkumna ka sorkar na kata ka daw shuwa ba kum kine kiei kiei kin jia ka sorkar ka dei ban sngewthuh ïa la ka kamram,” u la bynrap.
U Samla Gerald u la ther tyngeh ruh ïa ka sorkar kaba pyrshang ban thet kti ïa kane ka kam bad ruh ïa ki MLA na rilum Khasi kiba ym khlem kren eiei ïa kane ka mat.
“Nga kwah ban kyntu ïa ki 30 ngut ki MLA Khasi ba kin peit noh kham palat ïa ka saiñ pyrthei ban klet ïa ka jinglong party hynrei ban kren ïa kane ka mat ban pynkylla ïa ka Reservation Policy ban bhah kat kum ka jingdon paid,” u la ong.
“Ko phi kiba ieid jaidbynriew mynba phi dang long seng bhalang sngewbha seh pyni ïa kane ka jingieid mynta ba phi ïa long MLA bad myntri sorkar,” u la kyntu.
Haba ïadei bad ka jingkyntoh ka NPP ïa ka jingdawa ka VPP une u samla u la ther tyngeh bad ong ba kine ki nongïalam ka NPP wat la ki dei ki dkhot ka jaidbynriew hynrei ki kren kum ki dkhot ka seng saiñ pyrthei.
“Ko Kong Ampareen bad ko Dr WR Kharlukhi sngewbha buh shadien ïa ka saiñ pyrthei tang mynta ka kynti ban kynmaw ïa ki samla bad ka pateng ban wan bad sahngeh shuwa shiwat mynta ka jingpyrkhat kum ki dkhot ka NPP hynrei pyrkhat kum ki dkhot ka jaidbynriew Khasi bad kren seh ïa kane ka mat,” u la ong.
Shuh shuh u la ong ba na ka liang jong u ka jingwan kyrshan ïa kane ka jingïakhih ka dei beit ïa ka mat ym satia ïa ka party, “Nga kyntu ïa ki seng bhalang bad ki paidbah hi baroh ban kyrshan ïa kane ka jingdawa ka VPP,” u la ong.
Haba ïoh ban ïakren sa bad iwei pat i riewtymmen iba la wan ban kyrshan ïa kane ka jingïakhih i la ong ba ka jingwan kyrshan ka dei beit namar ki ïohi ba kane ka jingïakhih u Bah Ardent kam dei na bynta ka VPP hynrei na bynta ka jaidbynriew.
“Ngi duwai ba u Blei un sei nongïalam bad nga ngeit ba u la sngap shisha ban sei da u Bah Ardent bad namar kata ka daw nga wan ban kyrshan ïa kane ka jingïakhih,” i la ong.
“Phi ki MLA kiba la kular ban kren bad phi ki party ba la khlei ha ki mat kular elekshon ïa kane ka mat sngewbha pyni da ki kam ïoh ba u Blei un ai jingbishar ïa phi ba ka jingbeh spah jong phi kan ym pynmyntoi eiei hynrei kan pynlyngnga bad shuwa ban jia kata sngewbha kylla kaba mut,” i la kyntu.