Resubelpara, Ïaïong 09 : Ka All India Trinamool Congress ha ka sngi Saitjaiñ ka la leit sa ha Resubelpara, North Garo Hills na ka bynta ban thaw ïa ka Resubelpara Block Trinamool Congress Committee.
Ha kane ka jingïalang la donlang ruh da ki spah ngut ki paidbah kynthup naduh ki longkmie longkpa haduh ki samla kiba thrang ban trei na ka bynta ka party.
Ha ka jingïalang ka la don ruh ka jingïatai kumno ban pynkhlaiñ shuh shuh ïa ka party ha katei ka thaiñ na ka bynta ban pynkhreh ïa ka elekshon MLA kaban long ha u 2023. La donlang ruh ha kane ka sngi naduh u MDC ka TMC na Rongrong constituency, u kyrtong ba kwah aireng na Resubelpara, u Rinaldo K Sangma bad u nongïalam ki samla TMC bad u kyrtong ba kwah aireng na Daddengre constituency, u Rupa M Marak.
Katkum ka kyrwoh la ong ba ka jingbun ki paidbah ba wan sha katei ka jingïalang na man la ki kyndong jong ka thaiñ ka pyni ba ki paidbah ki dang don ka jingshaniah ha ki nongïalam jong ki hapoh ka jingïalam jong u Dr. Mukul Sangma.
Shuh shuh la ong ruh ba ki paidbah na ki saw tylli ki constituency jong ka North Garo Hills ki kwah ba sa shisien pat kin wan biang ha ka bor.
Ha kane ka sngi ki nongïalam ka Resubelpara TMC ki la jied ruh ïa u Pildash Marak bad Sengjrang Sangma kum u President bad Secretary jong ka Resubelpara Block Trinamool Congress Committee. Kane ka long katkum ka kyrwoh ba la phah da u Sengjrang Sangma, Secretary
