Shillong, K’Lyngkot 21 : Mar ïa sdang u snem thymmai, ka Shillong Archdiocese ka la ïoh sa 9 ngut ki Lyngdoh Sohblei ba thymmai na ki parish bapher bapher.
Ïa kitei ki 9 ngut ki dikon la pynkyntang Lyngdoh da u Most Rev Archbishop Victor Lyngdoh ha Iingmanebah Laitumkhrah ha kane ka sngi Saitjaiñ ha ryngkat ka jingdonlang kiwei ki Lyngdoh Sohblei nalor kiwei kiwei ki riewniam, ki bahaiing ha sem jong ki bad ki paidriewngeit.
Kitei ki 9 ngut ki Lyngdoh ba thymmai ki kynthup ïa u Fr. Wanlambok Lyngdoh na Good Shepherd Parish, Jongksha, Fr. Abialstar Kharsohtun SDB na St Mary’s Parish Mawpat, Fr. Donboklang Dohling na St Joseph Parish Mawkhar, Fr. Edringson Lawai na Divine Mercy Parish, Mawryngkneng, Fr. Alphonse Lyngkhoi na St Dominic Savio Church Parish Mawlai, Fr. M. Pyndapboklang Sohkhlet na Church of Resurrection Parish Pynursla, Fr Wadbhabantei Wahlang na St. Francis Xavier’s Church Parish Mawsynram, Fr. Joseph Munsi Rai na St John’s Church Parish Laban, Fr. Protasius Syngkli na St Paul’s Parish Mawlasnai.
Ha ka sneng ka kraw, u Archbishop u la kyntu ïa ki Lyngdoh kiba dang shu dep kyntang ba kin long barabor ki atiar jong u Blei da ka bor jong u Mynsiem Bakhuid.
