Shillong, K’lyngkot, 21: U Nongïalam ka Liang Pyrshah jong ka Iingdorbar Thawaiñ ka Jylla u Dr. Mukul Sangma ha ka sngi Saitjaiñ u la plie paidbah ïa ka ophis treikam jong ka Meghalaya TMC ha Moulakandi kaba hap ha Tikrikilla Assembly Constituency.
Da ki phew spah ngut ki paidbah jong ka Constituency ki la sakhi lang ha ka jingplie ïa kane ka ophis treikam bad ïohlad ban ïakren bad u Dr. Mukul Sangma.
Ha ka jingïakynduh bad ki paidbah, u Dr. Mukul u la ai mynsiem ïa ki bad ïakren ruh ïa kiba bun ki jingeh ba ki ïakynduh.
Ha ka 6 tarik mynta u bnai, ka TMC ka la pynbna ïa u Dr. Mukul Sangma kum u kyrtong ban aireng na Tikrikilla bad ha ka jingleit iuhkjat jong u ha kane ka Constituency ka la pynkyndeh mynsiem ïa kiba bun ki paidbah nongshong shnong.
Ha kane ka sngi, la sakhi lang da ki nongïalam bahakhmat jong ka Meghalaya TMC ba kynthup ïa u MDC barim jong ka Shyamnagar u Wahidur Rahman, u Sofiar Rahman Hazarika, u State AITC Joint Secretary u Raju Das, u President jong ka Tikrikilla Block u Lithindro Sangma bad kiwei kiwei.
