Yn ïakhun u Bah Generous Pasleiñ pyrshah ïa u Bah Sngewbhalang Dhar

Shillong, K’lyngkot, 21: Kan long ka jingïakhun kaba itynnat bha hapdeng u Samla Rangbah, u Bah Generous Paslein pyrshah u Bah Emlang Laloo, Sngewbhalang Dhar bad pyrshah ïa u Bah Dawan Lyngdoh na ka Lympung ilekshon 1-Nartiang Assembly Constituency ka ban long ha ka 27 tarik Rymphang, 2023.
Kane ka jingïakhun kan long ka ban thnam puk hapdeng kine ki 4 ngut ban ïaknieh ïa ki 44,300 ngut ki Nongthepvote jong kane ka Constituency Pnar.
U Samla nangbah, u Bah Generous Paslein u dei u khun eh kupar ba 3 jong u Bah Hilarius Dkhar, u ba la long MDC teng (2009-2014) bad ka Kmie Jong u ruh ka dei ka kmie donbok kum ka Kyrteng hi, ka kong Sngewkyrmen Paslein na ka shnong donnam, ka Namdong. U Bah Dawan Lyngdoh u dei na shnong Namdong bad u la paw namar u dei u MDC jong ka constituency Namdong. U Bah Emlang Laloo u dei na Saitsama um pat long MDC ne MLA. Katba u Bah Sngewbhalang Dhar lei u la bat kum u MLA la 2 term na 1-Nartiang bad 1 term na Nongbah-Wahiajer bad u la long u Minister ruh.
Kum ban shu kdew hangne, ka jingïakhun kaba jur eh ban ïaknieh ïa ki vote kan long ha ki shnong kiba hap kine ki centre shnong kiba kham heh – Khanduli, Lapangngap, Saitsama, Umshyngiar, Sonaro, Namdong, Mynsngat, Nartiang, Wahïajer, Ummulong, Moodymmai bad Mookyndur. Baroh ki don 59 tylli ki Polling Station ha kane ka constituency 1-Nartiang.
Haba la ïakren bad u Samla Rangbah u Bah Generous Paslein bad une u Nongthohkhubor u la ong ba ka thong ba hakhmat eh jong u ba ka bynta ka constituency ka long ban kyntiew ïa ka jingnang jingstad ka pule puthi: ban pynbha ïa ki Iingskul sorkar kiba kham i sangsot eh, ban wad ki lad ki lynti ban kyntiew ïa kiwei ki Iingskul ruh, ban wad ki lad ban buh shuh shuh ki nonghikai ha ki skul ba donkam nonghikai, ban pynkha shuh ïa ki kamra klas, ban iit ki lad ban kyntiew ïa ki Upper primary sha ki Secondary, Higher secondary skul bad Kumno ban buh Kolej ha ki Jaka ba la I donkam palat namar khlem kine ki lad ki nongshongshnong jong ka constituency ne la Jylla ruh kim ym poi shano shano ruh.
Halor ka ïoh ka kot u la kdew ha khlem ka ïoh ka kot kaba khlain ki briew jong ka constituency ne wat Jylla ruh kim ïohlad ban ïoh ka jingnang jingstad, ka koit ka khiah bad kiwei kiwei ki jingdonkam. U la ong ba ka rep ka riang (agriculture and horticulture) bad ka khaii pateng (0trade and commerce) ki dei ki Païa bah ban skhem khamtam ha Ri Pnar. Ka Pnar area lei lei ka dei ka thiarkba bad pliangja jong ka Jaintia Hills naduh mynshuwa bad mynta ruh. Kiwei kiwei ki jingïoh spah ki long tang shipor bad Don ki bynta ruh ba wanrah ïa ki jingjot. Ngi donkam ïa ki rukom rep kiba khambha Katkum ka Juk ki kor ki bor, ki rukom aium rep ha biang, ki Symbai babha bad Kiwei kiwei kiba bun jait. Ki kam ri jingri babun jait khamtam ban kyntiew ïa kito ki jaitkam ba la hiar pateng na ki kmie ki kpa bad ki longshuwa ba khlain bha ha Ri Pnar. Ngim dei ban klet ïa kine namar ki dei ka spah bah (assets) jong ngi.
Ha ka liang ka koit ka khiah shibun dang donkam ban leh. Ïa ki Sub-Centre, ki PHC bad CHC sand dei ban pynbha shuh shuh bad peit bniah, kiei kiei dei ban pynbiang khnang ban kham lah ban shakri. Lada la donkam palat dei ban kyntiew kyrdan ïa ki ba ka bynta ka jingdonkam kiba bun ba Lang ki nongshongshnong Katkum ki jaka. Ki dang donkam ki doctor, ki Nurse, ki nongtrei bapher bad ki tiar hospital bad Kumta ter ter. Dang donkam shibun ki Specialist ha ki lain bapher jong ka health Care ha nongkyndong bad ha sor Kumjuh. Ha ka mother and child care dang bun syrtap ki jingdonkam.
Na ka bynta ki Samla bad ki Longkmie ha constituency jong ngi dang donkam shibun syrtap ba dang dei ban shakri. Ki Samla ki donkam ka jingkner kti lem ba kin ieng hala ki kjat ha bun rukom, ha ka seng kam lajong da kaba kyrshan lem ïa ki katba don ki buit ki sap lyngba ki training bad kita ki skill development namar ka Juk ban ap kam sorkar ka la kut. Ha ka rep, ri jingri bad ki kam lajong babun Rukom ban im ki dang bun,Tangba ki donkam ki jingtip lynti bad ka seng lyngba ki Skhim bapher, kynthup ïa ki MLA MDC Skhim. Wat ki MLA Skhim ruh lah shibun ban kner sha ki, kynthup ïa ki Longkmie bad ki kynthei. Don shibun ki Skhim ba la bynta ki Longkmie bad ki kynthei hynrei ka sorkar kam peit bniah bad ka jur ka jingpyndonkam hok bad lehshiliang khmat, Wat ki MLA ruh. Sngewsih ban kdew ïa kine kiei kiei.