Shillong, Nohprah 01: Ka Ministry jong ka tnat Pule Puthi ka la pynjlan biang sa 15 sngi ïa ka committee jong ki arngut ki dkhot kiba tohkit halor ka jingkynnoh jong ka jingbym ïaid beit ïaid ryntih ki kam ki jam hapoh ka skulbah North Eastern Hill University (NEHU) ba kan aiti ïa ka kaiphot jong ka.
Kane ka la wan hadien ba ka por ba la buh ban aiti ïa ka kaiphot ka la kut ha ka 29 tarik u Naiwieng.
Ha ka shithi ba la pynmih da u Under Secretary jong ka sorkar pdeng u DK Himanshu sha u Chairman jong ka Inquiry Committee, NEHU bad u Chairman barim ka UGC u Prof DP Singh ka dei kaba la phah ha ka sngi Thohdieng jong u Naiwieng.
Haba ïadei bad ka hukum ba la pymih da ka Ministry ha ka 14.11.2024 bad sha u Chairman jong ka committee kaba tohkit ha ka 28.11.2024, ka la ong ba ka bor ba dei khmih (Competent Authority) ka la pynjlan sa kumba 15 sngi ba kan pynkut ïa ki jingshem bad ban ai ïa ka kaiphod kaba khatduh jong ka.
Ha ka 14 jong u Naiwieng, ka Ministry ka tnat Pule Puthi ka la thung ïa ka committee jong ki arngut ki dkhot ban tohkit ïa ki jingkynnoh ba ka la don ka jingbym ïaid beit ïaid ryntih ki kam ki jam hapoh ka skulbah.
Ïa kane ka rai la shim hadien ba ka la don ka jingïakhih shong shah thngan ba la ïalam da ka North Eastern Hill University Students Union (NEHUSU) bad kaba la kyrshan da ka Khasi Students’ Union (KSU – NEHU Unit), ban dawa ba dei ban wengnoh mardor ïa u vice chancellor u Prof PS Shukla, bad ïa u registrar bad ïa u deputy registrar.
Ha ka 25 tarik u Naiwieng kane ka kynhun tohkit jong ki arngut ki dkhot ka la kynduh ïa ki samla ba shah thngan bad ban sngap ruh ïa baroh ki nongtrei ka NEHU ba kynthup ïa ki samla pule, ki nonghikai bad ki nongtrei, kiba la phah ruh ka khubor kaba shai ba lada mih kano kano ka rai na kane ka kynhun tohkit, na ka liang jong ki kim kwah shuh ban ïohi bad ban pdiang biang ïa u vice chancellor ba un wanphai bad ban shimti biang ïa ka kam.
Ha ka hukum ka Ministry ka la ong, “Halor ki jingsngewkhia kiba jur bha ba la pynpaw da ki samla pule, nangta ka seng ki samla pule bad katkum ki jingmih ha ki lad pathai khubor, ka Ministry ka tnat Pule puthi ka la rai ban thaw noh da ka committee ban tohkit halor kine ki kynrum kynram hapoh ka skulbah North Eastern Hill University (NEHU), Shillong.”
Ka la ong ba dei halor kine ki jingshah kynnoh ka la pynlong ïa ka Ministry ban shim kam bad kaba kynthup ruh ïa ka jinghiar kyrdan ka university, ka jingthung beaiñ ïa ki nongtrei kiba ha ka kyrdan kaba heh, ka jingleh bym suitñiew ïa ki jingtei bad ka jingbym sngap jong u vice chancellor ïa ki jingeh jong ka skulbah.
Ka la don ruh ka jingkynnoh ba ka jinghiar kyrdan jong ka skulbah kumba la pyni hapoh ka National Institutional Ranking Framework (NIRF), ka dei ruh ka daw jong ka jingleh bym suitñiew jong ki bor ba dei peit.
Ka ministry ka la khmih ruh halor ki jingkynnoh ba ka la don ka jingthung kam kaba beaiñ ïa u Registrar bad Deputy Registrar, kaba la long ruh ka daw jong ka jingbym ïaid beit ki kam hapoh ka university bad kumjuh ruh ka jingbym kitkhlieh ïa ka bha ka miat ki samla pule ki la dei ki daw halor kine ki jingshah kynnoh.
Ka la ong ruh ba ki la don bun ki jingshah ujor bad ki dorkhas ba la phah da ka seng ki samla pule kiba la dawa ba kan dei ban don noh ka jingpynkylla thymmai kiba u Vice Chancellor u la leh bym ïohi bad ïohsngew.
