Hadien ba kut ka samoi treikam ka Ïingdorbar, lah ban pynïasoh u Bah Charles sha ka Congress

Shillong, Nohprah 01: U MLA ka Trinamool Congress napoh Nongthymmai Constituency u Bah Charles Pyngrope u la ong ba un peit bad khmih ha shwa ba un shim ïa kano kano ka rai ban leit pynïasoh biang sha ka seng Congress kaba u la don ha ki por kiba mynshwa.
Ïa kane u Bah Charles u la ong ha ka sngi Saitjaiñ bad pynpaw ruh ba lada u la iehnoh ïa ka AITC, u la ban mad ha ka shah mait kyrteng kum u MLA bad kumta ïa kane ka rai ka lah ban mih tang hadien ba la kut ka samoi treikam jong ka Ïingdorbar Thaw Aiñ (Assembly) kaba mynta.
Wat la ka elekshon MDC kan long ha u snem ban wan, hynrei ka lyer jong kane ka elekshon ka la sdang sma ha kaba bun na ki dkhot kiwei ki seng ki la wan ban pynïasoh sha ka Congress.
Kane ka la paw ha kaba ka Meghalaya Pradesh Congress Committee ha ka sngi Thohdieng jong u taïew ba la dep ka la pdiang sngewbha ïa kiba bun ngut ki dkhot jong kiwei pat ki seng saiñ pyrthei kiba la wan ban pynïasoh sha ka seng Congress ha ka jingïalang kaba la long ha Congress Bhavan.
Ïa kine ki dkhot kiba la wan ban pynïasoh ha kane ka sngi la pdiang sngewbha da ki nongkitkam ba hakhmat ka Congress kiba kynthup ïa u Bah RV Lyngdoh Chief Whip, u Bah P N Syiem uba dei u Deputy CEM ka KHADC, nangta ka Deborah Marak Working President u Bah Emanuel Badwar, u Bah Antonio War MDC barim bad kiwei kiwei ki nongkitkam jong ka party.
Ha kane ka sngi ha ka jingkren u MLA ka Mylliem u Bah R V Lyngdoh u la ong ruh ba u la khmih lynti ba u MLA ka Nongthymmai u Bah Charles Pyngrope u lah ban wan pynïasoh biang sha ka seng Congress bad ïa kane ki dang ap ïa ka jingai ktien jong u.