Shillong, Nohprah 1 : Ka Hynniewtrep Intergrated Territorial Organisation (HITO) ka la ai jingthoh sha u Myntri Kam Pohïing ka sorkar pdeng u Amit Shah ha kaba ka la kyntu bad kyrpad ïa u ba um bit da lei lei ruh ban ai bor pahara ïa u Vice Chancellor (VC) ka North Eastern Hills University (NEHU) u P.S Shukla kaba don ha Shillong.
Ha ka shithi sha u Amit Shah ka HITO ka la pynpaw ba ka la ïoh jingtip ba u VC u la pan bor pahara na ka tnad kam pohïing ban ai ïa u da ki bor pahara ka sorkar pdeng da kaba kynnoh ba ki bor pahara ba pynbiang da ka sorkar jylla kim long kiba bit bad biang na ka bynta jongu. Ka seng ka pynpaw ba kane ka jingpan jongu ka long kaba khlem nongrim namar ïa ki bor pahara ka sorkar pdeng la thung ba kin ïada ïaka ri ym ban ïada ïa u riew shimet.
Nalor kata ka HITO ka pynpaw ruh ba lada ka sorkar pdeng ka ai bor pahara ïa u u lah ban pyndonkam bakla ïa ki pyrshah ïa ki samla pule bad nonghikai bad ki kam shimet jongu. Namar une u VC u la pynpaw ïa ka jinglong hanga mei, jingbym salia ïano ïano ruh bad u la ju pyndonkam bakla ïa ka bor jongu ha kiba bun ki bynta.
Ka long kaei kaei kaba sngewsih ba u Shukla um burom ruh ïa ka tynrai bad dustur jong ki paid Hynniewtrep. Nalor kata u nud ban ym kheiñ snep ïa ka jingbthah ka Mawlai Town Dorbar ruh kaba kdup 17 tylli ki Dorbar Shnong kaba la shim rai ban ym shah ïa u ban rung hapoh u pud u sam ka NEHU kaba hap hapoh ka Mawlai Town Dorbar.
U lah ban ym kheiñ snep ïa kane ka rai jongka Mawlai Town Dorbar tangba u dei ban tip shai ba ha ka riti dustur jong u paid Hynniewtrep kaba kum kane ka rai Dorbar ka dei ka rai kyntang bad burom da baroh namar ka dei ka bor ba halor duh ha ka synshar khadar shnong.
U Shukla lehse um tip ba dei ka Mawlai Town Dorbar kaba pynïoh ïa katei ka jaka ban buh ïa ka NEHU hynrei kane ka jingleh jongu ka long kumba ym burom ei ei shuh ïa ka imlang ka sahlang bad ka rukom im jong u Khasi.
