Ryngkat ki longkmie leit pynïasoh ka NPP Ranikor Block bad ki NPYF Warsanlyngdoh Area sha UDP

Mawkyrwat, Rymphang 13: Ka United Democratic Party (UDP) jong ka Ranikor Constituency hapoh ka jingïalam jong u bah Pius Marweiñ kum u kyrtong u ban sa ïakhun ha kane ka MLA Election 2023 u la pdiang sngewbha ïa ki nongïalam jong ka NPP Ranikor Block kynthup ruh ïa ki nongïalam ka National People’s Youth Front (NPYF) ryngkat ki longkmie kiba dei na ka Warsanlyngdoh Area ba long ki nongkyrshan ba pura ha ka UDP.
Ka jingleit pynïasoh jong ki briew kiba don bad ka NPP sha ka UDP la ong ba kim shem la don kino kino ki daw hynrei ka long ba kim sngewtynnad ïa ka BJP namar kumba ka long mynta ba u Martin M. Danggo u la mih noh na ka NPP bad u la leit pynïasoh thymmai noh ïa lade bad ka BJP bad u ba la paw ruh ba un long u kyrtong u ban sa ïa khun ïa kane ka MLA Election 2023 na ka Ranikor Constituency.
Lah ban kdew ruh ba ïa katei ka jingïalang ban pdiang burom la pynlong ha ka sngi saitjañ jong ka taïew ha Shnong Wahkaji, South West Khasi Hills District ha ryngkat ka jingïadonlang u bah Airmarshall Diengngan, u bah G.G. Bung Snaitang, u bah C. Nongbri kiba dei ki nongïalam ba khmat jong ka UDP Ranikor Circle lem ruh bad ki nongkyrshan jong ka party.