Ha man la ki elekshon ki Political Party ki ju wanrah ne pynmih beit ïa ki mat ïaleh elekshon ne ki Manifesto bad bun ki ruh ki da sam sha ki paidbah ba kin pule. Hynrei ym ju kham ïoh sngew pat ba ki kyrtong haba ki ïeng ha rynsan ban ïalap ba kin kren halor kine ki mat ïaleh elekshon ne ki manifesto.
Ha kajuh ka por ruh, hato ki paidbah ki sngewthuh ne ki da pule ne em ïa kine ki manifesto haba ki rai ban jied ïa uno uno u kyrtong ne ki jied beit tang ha ka jingsngew ne ka jingsngew ïajan, ka jingsngew bahïing ne ka jingsngew ieit ïa u ne ka kyrtong ba ki la ïarap ha ka por ba ki don hapdeng ki jingeh ne ka shitom shipa ne ha ka ïap ka im. Kiba bun hi kim pynshong nongrim halor ki mat ïaleh elekshon jong ki Party, ym kumba long sha kiwei pat ki bynta jong ka ri India ba ki paidbah ki da pynshong nongrim ïa ki mat ïaleh elekshon jong ki Party.
Haba kumne ïano yn kynnoh, hato dei ka jingbakla ki paidbah nongthep vote ne dei ka jingbakla jong ki Party ne ki kyrtong. Lada peit ïa ka rukom pyllait ne pynbna mat ïaleh elekshon ki Party, kiba bun hi ki pyllait ynda haba u paidbah u ladep rai ïano ban jied ne ïano ban kyrshan, namar ki pyllait tang kumba shi bnai ne artaïew shuwa ka sngi thep vote, kaba mut ba uba bun balang hi te u ladep ban rai ïano ban kyrshan, lait noh tang katto katne kiba dang don hapdeng bad ym pat rai ïano yn jied. Tangba kine ruh kim ong ba ‘ap ynda ïoh shuwa ka manifesto ne ynda peit shuwa ïa ki mat ïaleh elekshon, ‘ngin sa rai ïano ban jied”.
Nangta kawei pat ka long ba kiba bun hi ki Political Party hangne ka manifesto ka shu dei tang ka jingpyllait pyndep rukom, ym ju kham ïoh sngew ba ki Party kin pyntreikamïa ki mat kiba don ha ki Manifesto. Ha kane ka jylla lei lei kaba ïasynshar khleh khawlang ki Party ba bun jait, ym don tang ka Common Mininum Programme ne kita ki mat treikam ban kiba ïabiang lang na baroh ki Party ba don ha ka sorkar na ka bynta ka jingtreikam jong ka sorkar. Ka sorkar MDA san snem ka treikam khlem kino kino ki Common Minimum Programme. Dei namar kane ka daw ynda ka poi ka por elekshon, kijuh ki Party ba ïatreilang ha ka sorkar ki ïabeiñ kylla kawei ïa kawei ka Party.
Haba kren ïa ki mat ïaleh elekshon ne ki Manifesto, la ïohi ba ka Seng BJP kaba synshar ïa ka ri India mynta naduh ka snem 2014, ka la pyntreikam beit ïa ki manifesto jong ka. Kawei na kine kadei ka jingpynduh noh ïa ka Article 370 ha Jammu & Kashmir. Kane ka jingpynduh noh ïa ka Article 370 ha kane ka jylla, ka la wanrah ka jingpyrshah kaba jur na ki paidbah ka jylla bad bun ki bynta jong ka ri India. Hynrei ka BJP ka la ïeng skhem halor ka nongrim ba kane ka mat ban pynduh ïa kane ka Article kadei kaba la don ha ka Manifesto jong ka BJP lah slem, hynrei haba ki paidbah ki ai jingjop ka Seng kaba mut ki paidbah ki kyrshan ban pynduh ïa kane ka Article. Kajuh ha kaba ïadei bad ka CAA, ka BJP kala buh ha ka Manifesto bad dei namar kane ka daw ba wat lada ki jingpyrshah ki jur ha ka ri India baroh kawei, ka BJP kam sngap bad ka ïaid beit shakhmat. Sa kawei ka mat ïaleh elekshon kaba lah ban pynkhih ïa ka ri India bad kata kadei ka Uniform Civil Code ba ka BJP kam pat pyntreikam. Hynrei kane ka mat ruh ka la poi ha Rajya Sabha lyngba ka Private Member’s Bill kaba ym slem ïa kane ka Bill yn sa rah ban ïatai ha ïingdorbar Thawaiñ jong ka ri India.
Hynrei haba phai sha kane ka jylla pat, kibabun ki Party kim ju treikam satia katkum ki Manifesto wat hadien ba ki la wan ha ka bor synshar bad dei namar kane ka daw ba ki paidbah nongjied ruh kim ju da salia than ïa kita ki Manifesto, hynrei ki jied beit katkum ka jingsngew jong ki bad bun don ruh ki jaka ba ki jied ïa ki nongmihkhmat jong ki haba ki ïoh pisa ne ba ki sngew ïoh jingmyntoi shimet ïalade.
