Shillong, Rymphang 13 : Ka lympung ïalehkai kriket ba la pynïaid da ka East Khasi Hills Cricket Association (EKHCA) kaba la tip kum ka 2nd District League T20 Cricket Tournament 2023 ka dang ïaid shaphrang, da kaba pynïalehkai ïa ki saw tylli ki team ha ka sngi Nyngkong.
Ha kane ka jingïalehkai ki saw tylli ki team kiba la mih madan ki kynthup ka Thangsning SCC pyrshah ïa ka Laitjem CC bad ka Hurdles CC pyrshah ïa ka Combine CC.
Haba phai sha ka jingïalehkai kaba nyngkong hapdeng ka Thangsning SCC bad Laitjem CC, ka Thangsning kaba la jop ïa ka jingkyntieng pisa ka la ailad tied nyngkong ïa ka Laitjem CC bad katei ka kynhun ka la kamai 145 ron duh noh 5 wicket ha baroh ki 20 over.
Dei tang u Mebanshan Kharsati uba la kamai bun ron da 41 ron na ki 49 bol bad u Kitlyngkor Nongkhlaw u khur 2 wicket ai kamai 23 ron ha ki 4 over na ka bynta ka Thangsning SCC.
Haba beh ïa katei ka ron, ka Thangsning SCC kam shym la lah ban kynjoh ïa ka thong ba la buh da ka Laitjem CC bad kamai tang 128 ron duh noh 8 wicket ha baroh ki 20 over bad dei tang u Badap Pura Nongkhkaw uba la kamai bun ron da 27 ron na ki 28 bol katba u Nangkham Khraw Pathaw marwei u khur 3 wicket ai kamai 16 ron ha ki 4 over. Kumta ka Laitjem CC ka la jop da 17 ron bad ïa ka nam Player of the Match la ïoh rah da u Anthony Pathaw.
Ha ka jingïalehkai kaba ar, ka Hurdles CC kaba la jop ïa ka jingkynting pisa ka la kam trai ban tied nyngkong bad kamai 92 ruh khyllem noh 10 wicket ha ki 14.3 over, u Antonio Rapsang u kamai 20 ron na ki 18 ron bad u Mangkara Diengdoh u khur 4 wicket ai kamai tang 8 ron na ki 2.3 over.
Watla ka Hurdles ka buh ka thong kaba duna hynrei ka Sohra Combine kam shym la lah ban kynjoh sha ka thong ha kaba ka la mad nam rem noh da 7 ron. Ka Sohra Combine ka kamai tang 85 ron duh noh 9 wicket ha baroh ki 20 over bad dei tang u Mangkara Diengdoh uba kamai 27 ron na ki 23 ron.
U Ricky Stone Nongbet u khur 3 wicket ai kamai 10 ron na ki 4 over, bad ïa ka nam Player of the Match la ïoh rah da u Ricky Stone Nongbet jong ka Hurdles CC.
