Sohryngkham, Risaw 29: Ka Dorbar Seng Kur Warjri ka la ïoh ban rakhe ïa ka lyngkhuh dap 25 snem ïa kaba la sdang naduh mynshem snem lyngba ka Dorbar Kur ha shnong Sohryngkham.
Ha kane ka jingrakhe dap 25 snem na ka liang jong ka Dorbar Seng Kur Warjri ka la ïoh ban pynlong ïa jingpyninam ïa ki syntiew, ka thohdur, ka thoh essay bad poetry, ka shad ka rwai bad ki rukom lehkai kilanmet kum ka Football bad Basketball.
Barohlang, ki don haduh 12 tylli ki kynhun napoh ki shnat jong ka Upper Shillong, Wahlang, Manai, Pyndemumiong, Thynroit, Mawphlang, Mawkneng, Siejiong, Pommura-Nongkynrih, Mawlai Datbaki, Urur Rangshken bad ka Mawprem ki ba la shim bynta shitrhem ha ki jingïalehkai ba la pynlong lai sngi naduh 21 tarik Risaw haduh 25tarik Risaw, 2023 ha madan Rangshken.
Ha ka phutbol, ka jingïakhun final ka la long hapdeng ka Urur Rangshken pyrshah ïa ka Manai, ha kaba ka kynhun jong ka Manai ka la rah ïa ka namlahduh.
Nalor ka khusnam ïa ka kynhun lahduh, la sam khusnam ruh sha ki rangïalehkai shimet kiba la ïohnam kynsai,, ha kaba u Freddy Fender Warjri jong ka Manai u la khur ïa ka khusnam ‘best goalkeeper’, u Balajied Warjri jong ka Manai bad u Shimbor Warjri jong ka Urur Rangshken ki la khur ïa ka khusnam ‘nongthep kol buntam’ lane ‘top scorer’ kiba la thep mar 4 kol.
Shuh shuh u Balajied Warjri u la jop ruh ïa ka khusnam Best player katba u Micky Berth Warjri u la khur ïa ka khusnam Promising Football player. Haba phai pat sha ka rynsan ïalehkai Basketball kaba la pynlong na bynta baroh ar kynthei bad shynrang, ha kaba ki kynhun ba la wan ban shimbynta ki long na ka Mawlai, Laitumkhrah, Wahlang bad Mawprem.
Ha ka thup ïakhun jong ki kynthei, ka Mawlai ka la rah ïa ka namlahduh hadien ba pynliem ïa ka Wahlang unit, katba ha ka thup kyrdan ïakhun ki shynrang, ka Mawlai ka la rah da kaba pynliem ïa ka kynhun ka Mawprem unit.
