Shillong, Risaw 29: Nalor ki lai kynhun ba kynthup ïa ka Kharang SC, Iatyllilang SC bad ka Mawkriah West SC, bud sa ka Lamlynti FC kum ka kynhun ba khadduh ban ïohrung sha ka semi final ha ka lympung ïakhun jong ka SSA 4th DIVISION Football League 2023, bad kane ka la wan hadien ba ka la jop ïa ka Madan S&CC salit da shi kol ha ka jingïakhun quarter final kaba la long hynnin ka Sngi Saitjaiñ.
Haba phai sha kane ka jingïalehkai quarter final ba khadduh jong kane ka lympung kaba la pynlong ha 1st Ground SSA Stadium, ka jingïakhun ka la long kaba ïakhaid bad kaba itynnat bad ym shym la don ba lah ban pynïakhlad ïa ka jingïakhaid ha ka kylla step.
Dei hadien ba la jam sha ka 61 minit jong ka kylla kaba ar ba ka Lamlynti FC ka la ïoh ban lamkhmat ïa ka jingïakhun na ka daw ka jingbakla hi u rangïalehkai ka Madan S&CC , u Imeral Jana u ba la kum thep hi ïa ka bol shapoh kol lajong (Own goal).
Kane ka shi kol ka la ïeng skhem haduh kaba kut jong ka por ba la buh kaba la pynlong ïa ka Lamlynti FC ban buh jaka ïalade ban ïakhun ha ka semi final jong kane ka lympung mynta ka samoi.
