Shillong, Risaw 29: Ka Meghalaya Police Football Veterans (MPFV) bad ka Friends United ki la ïoh ban jam sha ka final jong ka lympung lehkai phutbol kiba la rangbah kaba la tip da ka Samkhamti Veteran Cup hadien ba ki la khur namjop ha ka semi final kaba la long hynnin ka Sngi Saitjaiñ. Baroh ar kynhun ki la jop lyngba ka tie breaker hadien ba ïakhaid haduh ba kut ka por ba la buh.
La sdang ïa ka jingïakhun ha ka por 12 baje mynsngi, bad ka semi final ba nyngkong ka la long hapdeng ka Sunrisers 11 pyrshah ïa ka Meghalaya Police Football Veterans (MPFV), haduh kaba kut jong ka por ym shym la don ba lah ban pynkhihjar, hynrei ka kynhun jong ka MPFV ka la jop da 5-3 ha ka tie breaker.
Katba ka jingïakhun semi final kaba ar ha ka por 2 baje nohphaisngi hapdeng ka Friends United pyrshah ïa ka Sumer veterans ki la ïakhaid haduh ba kut jong ka por ba la buh khlem don nongthep kol kaba la ïalam sha ka tie breaker. Dei hangne ba ka Friends United ka la jop da 7-6 ïa ka Sumer veterans ban ïohrung sha ka final.
Kumban shu pynkynmaw, la sdang ïa kane ka Samkhamti Veterans Cup naduh 7 tarik Risaw bad ki kynhun baroh ba la wan shimbynta ki long 16 tylli, la pynlong kum shi bynta ban plie lad ïa kiba la rangbah ban ïoh pynkhihmet ryngkat bad ka phang pdeng kaba ong ‘Sports for Fitness, Football for Fitness’.
Ka jingïaknieh namlahduh hapdeng ka Meghalaya Police Football Veterans pyrshah ïa ka Friends United kan long ha kane ka sngi Saitjaiñ ban wan (04 tarik Naiwieng, 2023), bad ka jingïakhun kan sdang ha ka por 1 baje mynsngi.
