Nongstoiñ, K’lyngkot 08: Ka Mawrusyiar Youth & Cultural Club ka la pynkut noh ïa ka jingrakhe ïa ka jubili ksiar jong ka jingdap sanphew snem jong ka ha ka sngi saitjaiñ ba la dep. Ha katei ka jingpynkut ïa katei ka jingrakhe kaba la pynlong ha madan jong ka shnong, la pynlong ïa ki jingïalehkai ba bun jait kaba la pynphuh pynphieng ïa katei ka sngi.
Nalor kata na ka liang ka Club ka la khot sngewbha ïa u Ma Vincent H.Pala MP ka Shillong Parliamentary constituency kum u kongsan bad ïa u bah R.G.Momin MLA ka Rambrai Jyrngam constituency kum u symbud kongsan.
Ïa katei ka jingpynkut ïa ka Jubili ksiar la pynïaid da ki nongkitkam jong ka Club ha kaba ki la khot lang ruh ïa baroh ki ba la ïadon bynta lang kum ki nongkitkam naduh ba la sdang ban seng ïa ka.
Ha kajuh ka por um ka dak jong ka jingpynsah jingkynmaw ka Club, ka la pynkhreh ruh ïa u mot sah jingkynmaw ïa ka jingdap sanphew snem, ha kaba u Ma Vincent H Pala kum u kongsan u la plie ïa utei u mot sah jingkynmaw. Ha kajuh ka por u la pyllait ruh ïa ka souvenir kaba la lum thup ïa baroh ki kyrteng jong ki nongkitkam bad ki dkhot jong ka Club ryngkat ki jingtreikam jong ka ha kine ki sanphew tylli ki sem.
Nalor kata la pyllait ruh ïa ka documentary phlim da u symbud kongsan bad ha katei ka documentary, la pyni ïa ki kam ba ka Club ka la trei bad ka jingïashim bynta ha kiba bun ki kam na ka bynta ban kyntiew ïa ka bha ka miat hapoh jong ka shnong bad kiwei kiwei ki shnong ba marjan bad ruh hapoh ka District.
Ha katei ka sngi shuwa ban ïoh ïa ka jingkren na ki riew rangbah, la ïoh ïa ka jingkren pdiang ïa baroh ki ba la wan ban ïashim bynta ha katei ka sngi da u samla Eric C.Kharsyntiew Vice president ka Club bad la ïoh ruh ïa ka jingkren lyngkot na u bah Sunshine Lyngdoh Nonglait sordar jong ka shnong.
Hadien ka jingkren jong u sordar shnong la ïoh ïa ka jingkren na u bah R.G.Momin uba long u symbud kongsan, ha kaba u la ong ba ki samla ha kine ki sngi ki donkam ban ïabeh ïa ka jingpule, namar haba ki trei ïa kino kino ki kam lada kim don ka jingnang jingstad kin ym lah ban kiew shaphrang.
Nalor kata u la ong ruh ba ki samla ki donkam ruh ban don ka jingkitkhlieh na ka bynta ban hikai lem ïa kiwei pat ki para samla ha shnong ha thaw ba kin ïabeh sha ka jingnang jingstad.
U Ma Vincent H Pala u ba long u kongsan haba ai jingkren kum u kongsan ha katei ka sngi, u la ai ka jingïaroh ïa ki nongïalam kiba seng ïa katei ka Club bad kiba la btin lynti ïa ki samla ba kin lah ban kynjoh sanphew snem ha ka jingtreikam jong ka.
U la ong ruh ba haba ïanujor ïa ka jinglong jingman ha ka imlang sahlang, ka Jaitbynriew Khasi Pnar ka dei ka jaitbynriew kaba kyrpang tam napdeng ki jaitbynriew jong ka pyrthei baroh, namar ha kiwei pat ki ri ka pyrthei, ym ju kam lap koit ba ki samla kin wan shakhmat ban trei na ka bynta ka jingbha jong ka shnong ka thaw bad ban btin lynti lem ïa ki samla kiba kham hadien.
Nalor kata u la ai nuksa ruh ba ha kane ka ri Khasi Jaiñtia, lada ka dei ha ki jingïaseng jong ki kynhun balang bapher bapher, ne ha ki jingjia ba sngewsih ha shnong ha thaw kum haba ïap briew ne don kino kino ki kam sngew bha, ki samla ki dei kiba hakhmat eh ban ïarap bad ban trei ïa ki kam kiba bun, hynrei ha kiwei pat ki ri ka pyrthei ym ju kham ïohi ba ki samla kin wan shakhmat ha ki jingdonkam.
Ha kajuh ka por u la kyntu ïa ki nongïalam jong ka Club ba kin nangïai trei shitom bad na ka liang jong u un pyrshang katba lah ban ïadon bynta bad ki ha ki jingdon kam.
Ha katei ka jingpynkut ïa katei ka jingrakhe ha ka por janmiet, la wan ban ïa shim bynta da ki kynhun nongtem bad nongrwai kum ka Kid’s Tarari, Thunder’s Cave bad Snow White kiba la pynkmen bad pynshongshit ïa ki paitbah kiba la wan ha katei ka madan.
