Shillong, Risaw, 04: U Bah Anthony Kongwang, uba long u nongkyrshan baratbah jong u MLA ka Pynursla Constituency u Bah Prestone Tynsong uba la mih noh dang shen na ka National Peoples Party (NPP), ha ka sngi Baar u la pynïasoh ïalade sha ka United Democratic Party (UDP).
Da kane ka jingpynïasoh jong u Bah Kongwang sha ka UDP, la thikna ba un pynkyndeh mynsiem pyrshah ïa u Bah Prestone Tynsong uba long ruh u Symbud Myntri Rangbah ka Jylla ha ka Elekshon sha ka ingdorbar Thawain ka ban sa long ha u snem 2023.
Ka thymmei khubor ba la ïoh lum da u Mawphor ka ïathuh ba ka UDP ka bym pat don kyrtong ban pynïakhun ha ka elekshon 2023 kan pynïakhun da utei u kaitor ba pawnam na Riwar Mihngi.
Ha ka jingïalang kaba la long ha ka shnong Pynursla, ïa u Bah Anthony Kongwang la pdiang burom da u President ka UDP Pynursla Circle u Bah Aihok Khongmalai ryngkat ka jingïadonlang jong u MDC ka Lyngkyrdem-Laitkroh Constituency u Bah Ryngkatlang Lyndem bad kiwei kiwei de ki nongkitkam kiba hakhmat jong ka party.
Kum ban shu phaidien, u Bah Anthony Kongwang u dei uwei na ki nongkyrshan baratbah bad u nongrwai uba la pynshongshit ïa ki rynsan ïalap elekshon jong u Bah Prestone Tyngsong ha ki elekshon kiba la dep, kata, ha u snem 2013 bad 2018 ban khring ïa ki paidbah ka thaiñ Pynursla Consti tuency sha ki rynsan ïalap elekshon bad ban pynjop donburom ruh ïa u Bah Pretone Tynsong ha kine ki elekshon baladep.
U Bah Anthony Kongwang u dei uba la ju mih ban ïakhun ïa ka elekshon MDC jong ka Khasi Hills Autonomous District Council ha u snem 2014 bad u la poi ha ka kyrdan kaba ar.
Kane ka jingmih noh jong u Bah Anthony Kongwan na ka NPP ka la pynktha khlieh ïa u Bah Prestone Tynsong uba la pynkhreh ban aireng biang ha ka elekshon ha u snem 2023.
